Gia per la setavla giada surdat il "fond cultural Eliette von Karajan" premis a persunas grischunas che lavuran sin il champ cultural. Distinguì vegn in artist cun il premi principal d'in import da 40'000 francs. Tschintg ulteriuras artistas ed artists survegnan premis d'in import da mintgamai 20'000 francs.

Perquai che la famiglia von Karajan ha prendì domicil en il chantun Grischun avant bunamain 45 onns, ha Eliette von Karajan fundà l'onn 2000 il "fond cultural Eliette von Karajan" per il chantun Grischun. Ils premis duain dar la pussaivladad a las persunas ch'als survegnan da sa sviluppar vinavant sin lur champ e da pudair sa deditgar en moda anc pli intensiva a lur lavur culturala. Ultra d'esser in sustegn finanzial èn ils premis er ina stima ed ina conferma da la lavur prestada fin ussa.

Quest onn vegnan distinguidas sis Grischunas e Grischuns cun premis d'ina valur totala da 140'000 francs. Il titular dal premi principal da l'onn 2008 ch'è dotà cun 40'000 francs è dr. Giovanni Netzer, Savognin (teater da musica). Ulteriurs premis d'in import da mintgamai 20'000 francs survegnan: Martin Armin Caduff, Tartar (chant), Nyna Cantieni, Cuira (chant), Ervin Huonder, Winterthur (ghitarra), Richard Just, Lai (percussiun), ed Ella Schädler, Cuira (saut).

Infurmaziun per las medias:
En l'internet sut www.graubuendenkultur.ch , rubrica "Medias", chattais Vus biografias curtas da las titularas e dals titulars dal premi 2008. Medemamain stattan a disposiziun là fotografias da passaport da quellas persunas.


Gremi: departament d'educaziun, cultura e protecziun da l'ambient
Funtauna: rg uffizi da cultura