Cuntegn da la pagina

Moviment sin il champ da furmaziun da la Svizra taliana

  • Erste Mitteilung
  • Neuen Beitrag einfügen
Ils chantuns Tessin e Grischun vulan tgirar ed intensivar lur buna collavuraziun sin il champ da furmaziun. A questa finamira serva ina nova cunvegna ch'ils cussegliers guvernativs Claudio Lardi e Gabriele Gendotti han suttascrit ils 18 da favrer 2008 a Grono sco represchentants da la regenza grischuna e da la regenza tessinaisa. La cunvegna regla la frequentaziun da scolas medias sco er da scolas professiunalas spezialisadas e d'instituziuns da la furmaziun professiunala superiura dal chantun Tessin tras scolaras e tras scolars dal Grischun talian.
Dapi onns eran sa cumprovadas las cunvegnas che han garantì a las scolaras ed als scolars sco er a las studentas ed als students dal Moesano l'access a lieus da scolaziun tessinais. A partir da l'atun 2008 stat la ritga purschida da furmaziun tessinaisa che suonda la scola obligatorica, a disposiziun da nov a persunas da tut il Grischun talian. Per frequentar ina scola tessinaisa ston las interessentas ed ils interessents dal Grischun talian ademplir las premissas d'admissiun che valan en il Tessin. Per facilitar la frequentaziun d'ina scola en il Tessin paja il chantun Grischun contribuziuns als daners da scola. A persunas dal Grischun talian stat natiralmain a disposiziun sco fin ussa er l'entira purschida da scolaziun dal Grischun.
Per la scola obligatorica en il Grischun talian resulta pli e pli ina incumbensa dubla: En emprima lingia sto ella garantir la coordinaziun intrachantunala ch'è fitg impurtanta. Uschia ston ils plans, ils programs ed ils meds d'instrucziun s'orientar er en il Grischun talian tenor las prescripziuns generalas che ston vegnir resguardadas en il Grischun. Ultra da quai daventa la coordinaziun entaifer il territori linguistic dentant en general pli impurtanta en connex cun la realisaziun dal concordat da HarmoS. La nova cunvegna - ch'è caracterisada da la bainvulientscha e da la chapientscha vicendaivla per las differenzas evidentas ch'existan per part en la Svizra taliana - tegna quint da questa situaziun da partenza.
Tras la nova cunvegna stgaffeschan ils dus chantuns Grischun e Tessin ultra da quai ina basa per in barat d'experientschas fritgaivel. Er en quest sectur duai vegnir rinforzada la collavuraziun. Pli e pli duain er persunas d'instrucziun dal Grischun talian pudair nizzegiar servetschs da documentaziun e purschidas da furmaziun supplementara en il chantun Tessin. En quest sectur ston dentant anc vegnir sclerids ils detagls.

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient
Neuer Artikel