L'emprim tom dal nov med d'instrucziun davart l'enconuschientscha da la patria per la 4. fin 6. classa dal chantun Grischun è gist cumparì. Il med d'instrucziun stat a disposiziun en las linguas tudestg, rumantsch grischun e talian e tracta la geografia e l'istorgia dal chantun Grischun sco er temas da la vita.

Suenter la terminaziun dal project vegn il nov med d'instrucziun a cumpigliar in cudesch per las scolaras e per ils scolars en dus toms sco er in ordinatur cun DVDs agiuntadas per las persunas d'instrucziun. Il project è collià en moda surregiunala, damai ch'igl è vegnì revegnì per quest intent ad in concept da la centrala interchantunala per meds d'instrucziun (CIMI). Uschia vegn il nov med d'instrucziun dal Grischun ad avair sumeglientschas evidentas cun ils novs meds d'instrucziun davart l'enconuschientscha da la patria dals chantuns Argovia, Basilea-Champagna ed Appenzell dador, e quai en la dimensiun, en il layout ed en la concepziun sco er en l'elecziun dals temas ed en la repartiziun dals chapitels.
Il punct da partenza dals texts e da las incumbensas è adina il mund da viver dals uffants - il giavisch central dal concept d'instrucziun è da sa referir a las enconuschientschas gia existentas ed a las experientschas da las scolaras e dals scolars.
Ils cuntegns dal plan d'instrucziun da la 4. fin 6. classa per ils roms reals istorgia e geografia sa chattan en il tom I ch'è ussa avant maun. Cun agid da funtaunas istoricas emprendan ils giuvenils a perscrutar ed a chapir connexs tranter l'ier e l'oz. La diversitad dal chantun ed enconuschientschas geograficas fundamentalas vegnan intermediadas en moda exemplarica tras tscherts tschernids. Latiers vegnan - cunzunt en il tom II - temas da la vita, als quals igl è vegnì dà pauca attenziun fin ussa en il plan d'instrucziun dal Grischun. Igl è impurtant d'integrar quests secturs tematics surtut en vista al plan d'instrucziun da la Svizra tudestga ch'è planisà.
La repartiziun sin dus toms permetta ultra d'ina applicaziun pli simpla dals cudeschs er ina publicaziun en etappas. La publicaziun dal tom II è previsa per l'onn 2010.
A partir d'immediat po il tom I vegnir retratg tar la partiziun "meds d'instrucziun dal Grischun" sut www.lmv.gr.ch ed è interessant da leger er per persunas creschidas. Il tom II vegn furnì automaticamain suenter la publicaziun.

Gremi: uffizi per la scola populara ed il sport
Funtauna: rg uffizi per la scola populara ed il sport