La realisaziun da la cunvegna davart l'associaziun da la Svizra a la reglamentaziun
da Schengen/Dublin ha er consequenzas per la populaziun estra. A partir d'immediat
emetta l'uffizi da fatgs da polizia e da dretg civil dal Grischun novas legitimaziuns da
persunas estras. Ils visums d'entrada dals stadis da Schengen valan da nov er per la
Svizra.
Novas legitimaziuns da persunas estras
Persunas che n'èn betg burgaisas d'in stadi da la UE survegnan a partir d'immediat ina
nova legitimaziun da persunas estras, sch'ellas sa trategnan pli ditg che 4 mais en
Svizra e sch'ellas na pon betg sa referir a la cunvegna davart la libra circulaziun da
persunas. Exceptads da quai èn requirentas e requirents d'asil. La nova legitimaziun da
persunas estras ha il medem format sco la carta d'identitad svizra e cuntegna – ultra da
las datas persunalas e da las datas da dimora – er ina fotografia e la suttascripziun da la
persuna estra. Per laschar emetter la nova legitimaziun ston perquai vegnir inoltradas
ina fotografia da passaport e la suttascripziun. En quai che concerna la qualitad da la
fotografia e la regulaziun da la suttascripziun valan las medemas premissas sco per ils
documents da viadi svizzers. La procedura per emetter la nova legitimaziun è pli chara e
pli cumplitgada. L'identitad da la persuna sto vegnir controllada exactamain da la
vischnanca. Pervia da quai sto la dumonda vegnir inoltrada da nov persunalmain a la
controlla d'abitantas e d'abitants cumpetenta. Tut las legitimaziuns existentas da
persunas estras restan valaivlas fin a lur scadenza e vegnan remplazzadas pir suenter
tras ina nova legitimaziun.
Visums da Schengen
Dapi ils 12 da december 2008 vegnan acceptads ils visums da Schengen per entrar en
Svizra. Dapi questa data pon er las represchentanzas svizras a l'exteriur, ils chantuns
ed ils posts da cunfin emetter ils novs visums da Schengen, ils quals remplazzan ils
vegls visums svizzers.
Libertad da viagiar en il territori da Schengen
Dapi che la cunvegna d'associaziun è entrada en vigur, pon persunas che n'èn betg
burgaisas d'in stadi da la UE viagiar cun lur veglia u cun lur nova legitimaziun da
persunas estras sco er cun in passaport valaivel da lur patria en tut il territori da
Schengen, e quai senza visum supplementar e senza ulteriuras formalitads.
Gremi: uffizi da fatgs da polizia e da dretg civil
Funtauna: rg uffizi da fatgs da polizia e da dretg civil