Cuntegn da la pagina

Il post per marketing da cultura fa ina emprima bilantscha

  • Erste Mitteilung
  • Neuen Beitrag einfügen
Suenter bundant trais onns fa il post per marketing da cultura da l'uffizi da cultura ina bilantscha. La finamira da las activitads era quella da concentrar las purschidas ch'èn avant maun en il sectur da la cultura e da far valair meglier la diversitad culturala sco ritgezza per il turissem. La persistenza da las activitads dal marketing da cultura vegn garantida per gronda part da la cuntinuitad.

Cun stgaffir in post per marketing da cultura ha il chantun Grischun surpiglià ina rolla da piunier progressiva en Svizra. Pervia da quai n'han ins betg pudì sa basar sin strategias cumprovadas. Il champ da las activitads è perquai vegnì concepì en moda generusa per examinar e per experimentar cun differentas mesiras. Quai ch'è sa cumprovà vegn mantegnì ed optimà, activitads cun main success vegnan stritgadas respectivamain concepidas da nov.
In studi represchentativ davart la percepziun ch'è vegnì fatg en Svizra per incumbensa da la marca "graubünden" ha mussà che las persunas ch'èn vegnidas dumandadas resguardan la vasta purschida culturala sco er l'architectura surprendentamain moderna en il Grischun sco fitg expressiva. En cumparegliaziun cun las regiuns da concurrenza, sco la Part sura bernaisa, il Vallais u il Tirol è noss chantun vegnì giuditgà sco cleramain pli ferm en quests puncts. Er sche quests resultats na signifitgan betg ch'els èn il merit dal marketing da cultura dal Grischun, conferman els che las activitads da marketing en il sectur da cultura èn impurtantas per il Grischun.
Ils meds da basa da reclama èn stadas la plattafurma d'internet www.graubuendenkultur.ch che preschenta l'entira purschida culturala dal Grischun, sco er ina broschura infurmativa ed illustrada ritgamain che cuntegna numerusas indicaziuns fitg interessantas. Tuttas duas han chattà ina buna accoglientscha tar il public en mira. Pervia da quai vegni cuntinuà cun ellas - en ina furma optimada - er en l'avegnir.
Ultra da quai èn vegnidas realisadas singulas campagnas cun festivals e cun museums elegids, las uschenumnadas "ensainas" da la cultura grischuna, che stattan per la purschida culturala variada ed attractiva dal Grischun sco regiun da vacanzas da muntogna. Latiers tutgan p.ex. in'acziun da PR en il territori da sport da naiv dad Arosa sco er ina campagna d'inserats cun in'occurrenza integrada en "Das Magazin" cun ina reclama accumpagnanta sin la tavla electronica en las staziuns las pli grondas da la Svizra.
Il post per marketing da cultura ha inizià e sustegnì er projects transmuseals ed activitads da marketing dals trais museums chantunals. Il project il pli grond è stà la "sonda senza fin" a Cuira, in'occurrenza gronda ch'è vegnida realisada cuminaivlamain da 12 instituziuns culturalas da tut las spartas e cun la quala i duai vegnir cuntinuà pervia dal grond interess. Ina istorgia da success è er il plan da la citad da Cuira per uffants che carmala cun incumbensas divertentas da scuvrir la citad da Cuira e ses museums. Ultra da quai è vegnì sviluppà - ensemen cun l'AutoDaPosta Grischun e cun la Viafier retica - in bigliet cumbinà per ils museums da Cuira.

Infurmaziun per las medias:
Il rapport da bilantscha sco er maletgs chattais Vus sut www.graubuendenkultur.ch/media

Gremi: departament d'educaziun, cultura e protecziun da l'ambient
Funtauna: rg uffizi da cultura
Neuer Artikel