Cuntegn da la pagina

Progress tar l'execuziun dal dretg da persunas estras e dal dretg d'asil en il chantun Grischun

  • Erste Mitteilung
  • Neuen Beitrag einfügen
Dapi onns fan l'execuziun dal dretg d'asil sco er la lunga durada da las proceduras d'asil gronds quitads als chantuns. Per cumbatter delicts ed abus che vegnan commess da requirentas e da requirents d'asil sco er per augmentar la segirezza publica ha il chantun Grischun fatg sforzs supplementars ils dus ultims onns.

L'assistenza e la procedura èn vegnidas reunidas tar in post da servetsch
Per augmentar l'effizienza, tranter auter tar las controllas da persunas, ha la regenza reunì per il 1. da schaner 2006 il sectur da la procedura e da l'assistenza tar l'uffizi da fatgs da polizia e da dretg civil dal Grischun. Tras questa reuniun vegn manà l'entir sectur d'asil cun finamiras unitaras sco er cun las medemas infurmaziuns davart las singulas persunas.

Nov concept da collocaziun e d'assistenza ch'è collià cun la procedura
Sco emprim ha l'uffizi da fatgs da polizia e da dretg civil dal Grischun introducì in nov concept da collocaziun. Sco regla prevesa quel da collocar las requirentas ed ils requirents d'asil durant la procedura en differents centers collectivs cun standards d'assistenza graduads. Cun desister per gronda part da collocar persunas che han obligaziuns da sustegn e ch'èn suttamessas al dretg d'asil, en abitaziuns privatas, ha pudì vegnir cuntanschida ina meglra survista dal lieu da dimora e dal cumportament da tut las requirentas e da tut ils requirents d'asil.
Il nov concept da collocaziun prevesa da collocar e d'assister las requirentas ed ils requirents d'asil tenor il stadi da la procedura d'asil. En il center per l'emprima registraziun survegnan las requirentas ed ils requirents d'asil in sustegn multifar al cumenzament da la procedura, per ch'ellas e per ch'els sajan economicamain independents durant la procedura d'asil. Suenter che la procedura è finida, duai vegnir promovida la prontezza persunala da partir da la Svizra. Quai vegn fatg cun restrenscher las prestaziuns fin a l'agid d'urgenza che vegn garantì tras la constituziun.

Diever consequent da tut las pussaivladads da respediziun
L'uffizi da fatgs da polizia e da dretg civil dal Grischun promova en emprima lingia che las requirentas e ch'ils requirents d'asil refusads returnian voluntarmain en lur pajais d'origin. Per persunas che vulan returnar e per persunas ch'èn interessadas da returnar existan per quest intent ina purschida da return voluminusa sco er agids finanzials per il return. Sch'i na vegn betg fatg diever da quai e sche l'obligaziun da partir da la Svizra na vegn betg ademplida, pon las requirentas ed ils requirents d'asil refusads u persunas ch'èn illegalmain en Svizra vegnir spedids sfurzadamain en lur pajais d'origin. L'onn 2007 ha l'uffizi da fatgs da polizia e da dretg civil dal Grischun stuì expulsar sfurzadamain 64 persunas ed ha stuì surdar 17 persunas a terzs stadis sin basa da cunvegnas da readmissiun.

Regulaziun da dimora per "cas da direzza"
Da l'autra vart sa stenta il chantun Grischun da reglar sco "cas da direzza" quels cas, nua che la procedura d'asil è vegnida terminada cun in'admissiun provisorica e nua che la partenza da la Svizra na fiss strusch pli realisabla. D'ina tala regulaziun pon persunas profitar mo, sche lur identitad è dal tuttafatg enconuschenta, sch'ellas han ina reputaziun irreproschabla, sch'ellas èn economicamain independentas resp. sch'ellas na retschaivan betg agid social. L'uffizi da fatgs da polizia e da dretg civil dal Grischun ha perquai instradà proceduras per quellas 234 persunas che la confederaziun ha admess provisoricamain e che vivan dapi set onns u dapli en il Grischun. Pervia da la revisiun da la lescha d'asil èn questas persunas suttamessas dapi il 1. da schaner 2008 a la cumpetenza d'agid da las vischnancas. Per 109 persunas vegn l'uffizi da fatgs da polizia e da dretg civil dal Grischun a dumandar l'uffizi federal da migraziun, sch'el conceda ina permissiun da dimora per in onn (permissiun B), e quai per meglierar lur progress economic. En collavuraziun cun ina gruppa da lavur interdepartamentala ha l'uffizi plinavant instradà gia l'onn passà ulteriuras mesiras per promover l'integraziun da questa gruppa da persunas.

Success da las mesiras instradadas
Las mesiras instradadas han tut en tut schluccà las tensiuns en il sectur d'asil dal chantun Grischun. Grazia ad in'execuziun consequenta è sa reducì massivamain il dumber dals cas pendents en l'execuziun, e quai da 95 a 33 persunas. Dapi il 1. da schaner 2008 èn questas persunas suttamessas al nov urden da l'agid d'urgenza e vegnan collocadas en l'avegnir en il center d'expulsiun a Valzeina. Sco ulteriur success da l'execuziun è sa fatga valair ina ferma reducziun dals delicts che vegnan commess da requirentas e da requirents d'asil. Ils delicts penals èn sa reducids per 85%, ils delicts da narcotics per 82%. Uschia ha l'uffizi da fatgs da polizia e da dretg civil dal Grischun pudì reducir considerablamain er il dumber da las assegnaziuns d'in lieu da dimora e dals scumonds d'entrar en in tschert territori.
Er en l'avegnir vegn il chantun Grischun a cuntinuar cun l'execuziun consequenta dal dretg da persunas estras e dal dretg d'asil. Quai è er en l'interess dals umans che vegnan propi persequitads u ch'èn propi periclitads e che tschertgan protecziun en Svizra; lur dretgs na vegnan betg restrenschids tras las mesiras instradadas.

Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel