Sa basond sin la lescha federala davart radio e televisiun, ch'è vegnida revedida totalmain, ha l'uffizi federal da communicaziun (UFCOM) publitgà totalmain 54 dumondas da concessiun per radios d'undas ultracurtas (UUC) e per televisiuns regiunalas. La regiun da radio 32 "Svizra sidorientala" cumpiglia principalmain ils chantuns Grischun e Glaruna. Per concessiuns da radio èn avant maun duas dumondas, per concessiuns da televisiun ina dumonda. La regenza prenda posiziun davart questas dumondas visavi il UFCOM.

Decisivs per la posiziun da la regenza èn ils criteris da qualificaziun e da selecziun ch'il UFCOM ha formulà en il text da publicaziun. Quels han ina impurtanza speziala per il concessiunament. Areguard las concessiuns da radio ha la Südostschweiz radio/TV SA inoltrà ina dumonda per il Radio Grischa/Radio Engiadina, e la Radio Südost SA ha inoltrà ina dumonda per il Radio Südost. Las duas petentas sa differenzieschan fundamentalmain. Il Radio Grischa/Radio Engiadina ha in'experientscha da radio da 20 onns en il Grischun ed è preschent dapi lura sin il martgà, il Radio Südost è ina visiun che stuess anc vegnir sviluppada, fin ch'ella fiss madira da vegnir messa en funcziun. Omaduas dumondas derivan da persunas che han experientscha en il mund da las medias.
Las indicaziuns dad omaduas petentas laschan concluder che l'incumbensa da program possia vegnir ademplida en vista tematica sco er en vista a la diversitad da las opiniuns e dals interess, e quai per l'entir territori da derasaziun. Il medem vala per la producziun da las fanestras da program per ils districts da Malögia, dal Bernina e da l'En. Gist uschè suandablas èn plinavant las ideas da las petentas davart la garanzia da qualitad e davart l'observaziun da las cundiziuns da lavur da la branscha. Tar la garanzia da qualitad sa tracti da garantir che las finamiras e ch'ils standards da qualitad vegnian ademplids sco er da porscher resursas persunalas avunda per ademplir l'incumbensa da program.
Ils criteris "garanzia da la scolaziun e da la furmaziun supplementara dal persunal da program", "avertura dal territori da derasaziun" e "mesiras en vista a situaziuns da crisa" vegnan ademplids meglier en la dumonda dal Radio Grischa/Radio Engiadina che en la dumonda dal Radio Südost. Entant ch'il Radio Grischa/Radio Engiadina po sa basar en il sectur da la scolaziun e da la furmaziun supplementara sin ina collavuraziun cumprovada cun l'institut per medias e per communicaziun, cun la scola da linguistica applitgada e cun la scola auta da tecnica ed economia (SATE) a Cuira, mancan indicaziuns concretas tar il Radio Südost. Plinavant ha il Radio Grischa/Radio Engiadina avert pass per pass il territori d'emissiun actual entaifer 20 onns ed avriss ultra da quai il territori d'emissiun extendì entaifer 2 onns dapi il concessiunament. Las indicaziuns dal Radio Südost en quest reguard èn suandablas mo per part. La finala ha il Radio Grischa/Radio Engiadina ademplì l'incarica da prestaziun en situaziuns da crisa en il rom da la concessiun vertenta, ed el vegn a suttametter in concept correspundent en cas d'ina nova concessiun. Il Radio Südost na fa naginas indicaziuns en quest reguard.
Fitg impurtant per la regenza è ch'il rumantsch e ch'il talian vegnian resguardads adequatamain en il rom da la nova concessiun. En spezial duain ils programs da radio porscher ina contribuziun per meglierar la chapientscha vicendaivla tranter las gruppas linguisticas chantunalas. En quest connex sa tracti er d'infurmar detagliadamain e regularmain la populaziun tudestga en sia lingua davart ils fatgs culturals, socials e politics en las valladas rumantschas e talianas.
La finala renda la regenza attent ch'il chantun è gia sa participà cun investiziuns pli grondas a l'installaziun da l'infrastructura da radio existenta e ch'el n'è betg en cas da far anc ina giada talas investiziuns, sch'i dess in nov concessiunament.
Sco suletta petenta ha la Südostschweiz radio/TV SA inoltrà cun la Tele Südostschweiz ina dumonda da concessiun per derasar in program da televisiun regiunal en la regiun da la Svizra sidorientala (regiun da televisiun 12). La regenza sustegna questa dumonda che ademplescha tenor ses avis las premissas per dar la concessiun.
Ussa èsi chaussa dal UFCOM da suttametter al schef dal departament federal per ambient, traffic, energia e communicaziun (DATEC) propostas per ils concessiunaments, e quai resguardond la posiziun da la regenza. La basa per il giudicament èn ils criteris da d'agiudicaziun ch'èn gia vegnids menziunads. Davart quests criteris è la regenza s'exprimida concretamain en l'audiziun tar las dumondas da concessiun.

Gremi: regenza
Funtauna: rg chanzlia chantunala dal Grischun