Cuntegn da la pagina

La regenza beneventa il program naziunal nutriment e moviment 2008-2012

  • Erste Mitteilung
  • Neuen Beitrag einfügen
La regenza grischuna sustegna il program naziunal moviment e nutriment 2008-2012 planisà da la confederaziun. La regenza è da l'avis ch'igl è da dar gronda prioritad a la politica da sanadad ed a la problematica creschenta da surpais per motivs da la e da l'economia publica. Quai scriva la regenza en sia resposta a l'uffizi federal da sanadad publica. La regenza sustegna las finamiras dal program da cumbatter a moda effectiva surpais e corpulenza spezialmain tar uffants e tar giuvenils. Da princip vegnan beneventads ils secturs d'agir e las finamiras fixadas per in proceder coordinà en l'entira Svizra. Cunquai che la promoziun da la sanadad e la prevenziun èn la finala sutamessas als chantuns po il program dentant - tenor la regenza - vegnir realisà cun success mo sch'el vegn fatg en stretga collavuraziun cun las autoritads chantunalas. Tranter auter ha il program la finamira da promover in nutriment equilibrà sco er il moviment ed il sport e d'optimar purschidas da cussegliaziun e da terapia.

Da vischnancas e da regiuns
Surava: Sin la via principala a l'entrada a l'ost dal vitg da Surava, ordaifer il vitg, vegn extendida la zona da sveltezza maximala da 50 km/h "limita generala" per circa 170 meters en direcziun d'Alvagni-bogn. Plinavant vegn introducida in'avantzona da 60 km/h d'ina lunghezza da ca. 225 meters.

Contribuziuns chantunalas a differentas instituziuns
Teater da Cuira: Per la segunda part da la stagiun 2007/2008 (enviern/primavaira 2008) survegn il teater da Cuira ina contribuziun chantunala en la summa da 150'000 francs.
Federaziun grischuna per il sport: La contribuziun or dal fond da sport a la federaziun grischuna per il sport importa maximalmain 31'000 francs. Quest import vegn duvrà per il premi grischun per il sport, per realisar il parlament da sport, per metter a disposiziun ina infurmaziun giuridica e per l'activitad generala da la suprastanza l'onn 2008.
Tgira da monuments: Als custs per la restauraziun generala da la baselgia evangelica ad Igis-Landquart vegn pajada ina contribuziun da maximalmain 51'600 francs.

Projects da vias
La regenza ha approvà totalmain 14'936'000 francs per construir e per sanar ils suandants trajects da vias:
- via naziunala A13: lavurs d'impressari, punt dal Rain posteriur, Spleia vest
- via naziunala A13: renovaziun dal vial e dal sectur da traffic en il tunnel dal San Bernardin
- via naziunala A13: lavurs d'impressari per il tunnel dal San Bernardin, pregalaria nord
- via naziunala A13: lavurs d'impressari dal guaud da Cassana fin tar l'access da Nufenen
- via naziunala A13: lavurs d'impressari per la galaria dal guaud da Cassana

Gremi: regenza
Funtauna: rg chanzlia chantunala dal Grischun
Neuer Artikel