Cuntegn da la pagina

Concurrenza supplementara per promover la lavur culturala professiunala a partir da l'onn 2008

  • Erste Mitteilung
  • Neuen Beitrag einfügen
A partir da l'onn 2008 vegnan distribuids dapli daners tar la concurrenza per promover la lavur culturala professiunala en il chantun Grischun. Per quest intent stattan da nov a disposiziun 275'000 empè da 200'000 francs. En quest connex vegn la concurrenza dividida da nov en ina concurrenza per projects pli gronds ed en ina concurrenza per projects pli pitschens.
La concurrenza per promover la lavur culturala professiunala - ch'è vegnida organisada l'onn 2007 gia per la dieschavla giada - chatta adina in grond interess. Ils ultims onns è sa stabilisada ina cifra da circa 70 fin 80 candidatas e candidats.
Fin ussa vegnivan concedids stipendis libers e contribuziuns ad ovras en l'autezza da mintgamai maximalmain 20'000 francs. Quai ha gì la consequenza che projects qualitativamain buns, ma pli "favuraivels" èn vegnids dischavantagiads in pau. Per eliminar questas mancanzas e per distgargiar la concurrenza vertenta vegn la concurrenza dividida a partir da l'onn 2008 da nov en duas parts, e quai durant ina fasa da pilot da trais onns: en ina concurrenza per projects gronds ed en ina concurrenza per projects pitschens. La summa da 200'000 francs che steva a disposiziun mintga onn fin ussa, na vegn betg tutgada. Da nov stattan a disposiziun a partir da l'onn 2008 supplementarmain 75'000 francs ad onn per la concurrenza per projects pitschens. Qua vegnan surdads contribuziuns ad ovras e/u stipendis en l'autezza da maximalmain 10'000 francs.
La concurrenza existenta per projects gronds ha lieu er vinavant il mars, la nova concurrenza per projects pitschens ha lieu da nov il zercladur. Las cundiziuns da participaziun (colliaziun tematica cun il Grischun, domicil en il Grischun durant almain dus onns u dretg da burgais dal Grischun) ed ils criteris da qualitad (occupaziun seriusa, resonanza, relevanza ed autenticitad) restan ils medems.
La concurrenza per projects pitschens vegn valitada tras ina commembra u tras in commember da la cumissiun existenta per concurrenzas da la lavur culturala professiunala sco er tras ina represchentanta u tras in represchentant da la promoziun da la cultura dal Grischun. Durant la fasa da pilot vegn questa incumbensa surpigliada en spezial dad Esther Krättli Jenny, presidenta da la cumissiun da concurrenza, e dad Armon Fontana, promoziun da la cultura dal Grischun.

Gremi: uffizi da cultura
Funtauna: rg uffizi da cultura
Neuer Artikel