En la sessiun d'avust 2007 ha il cussegl grond deliberà la revisiun totala da la lescha davart las finanzas dal chantun Grischun. En il rom da questa revisiun totala è il secretariat da la cumissiun da gestiun (CdG) - che sa chattava fin ussa tar la controlla da finanzas - vegnì suttamess da nov al secretariat dal cussegl grond. A medem temp è vegnida stgaffida ina nova plazza per il secretariat da la CdG. Mesemna, ils 5 da mars 2008 ha la CdG occupà questa nova plazza.
Ella ha elegì Roland Giger, annada 1974, ch'è creschì si a Cuira. Suenter la matura a la scola chantunala a Cuira ha Giger studegià scienzas politicas a la scola auta da Son Gagl. Dapi la stad 2000 lavura Giger sco revisur tar la controlla da finanzas dal chantun Son Gagl. Igl è previs ch'el entria en plazza ils 4 d'avust 2008.

Gremi: cumissiun da gestiun
Funtauna: rg cumissiun da gestiun