Cuntegn da la pagina

La regenza exprima sia consternaziun davart la reducziun planisada da plazzas da lavur tar la cargo VFF

  • Erste Mitteilung
  • Neuen Beitrag einfügen
Cun displaschair e cun consternaziun ha la regenza grischuna prendì enconuschientscha da la reducziun annunziada da 126 plazzas da lavur da la cargo VFF a Bellinzona. La confederaziun sco proprietaria porta er ina part da la responsabladad.
En sia sesida dad oz ha la regenza puspè tractà las mesiras da sanaziun da la VFF cargo ch'èn vegnidas annunziadas la fin da l'emna passada. Ella prenda enconuschientscha dal fatg che sia brev urgenta dals 5 da mars 2008 a las viafiers federalas VFF ha cuntanschì pauc. La regenza sa mussa consternada en spezial da la reducziun planisada da plazzas da lavur tar la VFF cargo a Bellinzona. Ina part considerabla da las lavurantas e dals lavurants che lavuran a Bellinzona tar la VFF cargo abita en il Grischun. La regenza sa mussa solidarica cun las famiglias pertutgadas, independentamain dal fatg, sch'ellas vivan en la Val Mesauc, en la Val Calanca u en il Tessin.
Cun malavita constatescha la regenza che las VFF prendan mesiras da sanaziun senza consultar ordavant las regenzas pertutgadas u senza las infurmar. Dal puntg da vista da la regenza èsi difficil da giuditgar, sche las mesiras ch'èn vegnidas introducidas èn giustifitgadas u sch'i na dess betg alternativas. La regenza crititgescha che l'anteriur manaschament da las VFF haja evidentamain reagì memia tard, quai che chaschunia ussa mesiras rigurusas, per las qualas las lavurantas ed ils lavurants na sajan betg preparads. La regenza pretenda che tut las mesiras vegnian examinadas en moda concreta per mantegnair las plazzas da lavur en la regiun.
Per la regenza èsi cler che la confederaziun sco proprietaria da las VFF e da la VFF cargo portia ina part da la responsabladad. Cusseglier guvernativ Claudio Lardi vegn a s'orientar - sco represchentant da la regenza grischuna - quest suentermezdi directamain a Bellinzona e damaun vegn el a sa participar a la discussiun da la regenza tessinaisa cun cusseglier federal Moritz Leuenberger a Berna.
Gremi: regenza
Funtauna: rg chanzlia chantunala dal Grischun
Neuer Artikel