La regenza grischuna sustegna las midadas en l'ordinaziun davart la
concessiun per transports da persunas che vegnan proponidas da la
confederaziun.
Questas midadas miran ad ina liberalisaziun dals transports
professiunals da persunas tranter ils eroports svizzers e las
destinaziuns turisticas. Sco che la regenza constatescha en sia resposta
da consultaziun, èn ils giavischs dal chantun Grischun vegnids
resguardads per gronda part.
Da nov vegn il transport da turistas e da turists da gruppa definì
adina sco traffic occasiunal e na basegna pia betg pli ina concessiun. A
l'avis da la regenza è ina tala soluziun simpla e concisa zunt
impurtanta per l'attractivitad turistica da la Svizra. Ultra da quai
beneventa la regenza ch'ins ha chattà ina soluziun naziunala per la
concessiun da turistas individualas e da turists individuals sco er
ch'ins ha restrenschì la gruppa d'utilisadras e d'utilisaders sin
passagieras e sin passagiers d'aviun.
La regenza sustegna il project legislativ "Swissness" mo cun
resalvas
Da princip sustegna la regenza grischuna las stentas da la
confederaziun per rinforzar la protecziun da la denominaziun "Svizra" e
da la crusch svizra a l'interiur ed a l'exteriur dal pajais. En sia
resposta da consultaziun agiunscha ella dentant er intginas resalvas tar
il project legislativ "Swissness". Il project sto vegnir accordà
stringentamain cun las regulaziuns svizras vertentas davart las
indicaziuns da provegnientscha u davart las denominaziuns d'origin. En
quest connex renviescha la regenza en spezial a la discrepanza dal
criteri, tenor il qual stuessan resultar 60 pertschient dals custs da
producziun al lieu d'origin. Quai stat en cuntradicziun cun autras
disposiziuns vertentas. Uschia pretenda la regenza che products
regiunals tradiziunals ch'èn vegnids inscrits e ch'èn oriunds da la
Svizra stoppian ademplir automaticamain las indicaziuns da
provegnientscha tenor la lescha davart la protecziun da marcas. Per la
regenza na fissi betg acceptabel, sche per la pulpa per exempel, ch'è
inscritta cun ina indicaziun geografica protegida, na dastgass betg
vegnir utilisada la denominaziun da provegnientscha.
Las simplificaziuns da l'examinaziun ecologica sco er dal dretg da
recurs da las associaziuns èn bainvegnidas
La regenza grischuna beneventa la revisiun che la confederaziun
propona da l'ordinaziun davart l'examinaziun ecologica (OEE) sco er da
l'ordinaziun davart la designaziun da las organisaziuns per la
protecziun da l'ambient sco er per la protecziun da la natira e da la
patria che han il dretg da far recurs (ODO). Las adattaziuns èn
daventadas necessarias pervia da la revisiun da la lescha federala
davart la protecziun da l'ambient e da la lescha federala davart la
protecziun da la natira e da la patria. La revisiun ha la finamira da
simplifitgar las examinaziuns ecologicas e da reducir l'abus tar il
dretg da recurs da las associaziuns. Las midadas da las disposiziuns da
la OEE augmentan la segirezza giuridica, simplifitgeschan l'execuziun ed
han in effect d'acceleraziun sin las proceduras, scriva la regenza en
sia resposta da consultaziun. L'agiunta a la OEE cun la glista dals
indrizs suttamess a l'examinaziun ecologica è er vegnida repassada. Per
divers tips d'indrizs vegnan proponidas autras limitas minimalas ch'èn
per regla pli autas. La regenza è perencletga cun la gronda part da las
midadas proponidas, dentant betg cun tuttas. La revisiun da la ODO
concretisescha l'activitad economica ch'è anc permessa - sut las novas
prescripziuns legalas - a las organisaziuns per la protecziun da
l'ambient e duai far pli transparenta lur activitad da recurs. Quai
beneventa la regenza medemamain.
Segunda etappa da l'introducziun da la refurma da
l'administraziun GRiforma
La regenza grischuna ha deliberà la missiva tar la segunda etappa da
l'introducziun da la nova gestiun publica GRiforma. En quella vegnan
descrittas la structura da las gruppas da products ed ils effects dals
totalmain 9 posts da servetsch ch'èn vegnids vitiers da nov. Il cussegl
grond vegn a tractar questa fatschenta durant la sessiun da zercladur
2008.
L'october 2006 aveva il cussegl grond concludì d'introducir en
etappas la nova gestiun publica tenor ils princips da GRiforma en tut
l'administraziun chantunala. En in'emprima etappa han gia 18 posts da
servetsch introducì GRiforma per il 1. da schaner 2008. En la segunda
etappa suondan ussa 9 ulteriurs posts da servetsch che vegnan ad
applitgar la nova gestiun publica a partir dal cumenzament da l'onn
2009.
La missiva cuntegna infurmaziuns detagliadas davart la structura da
las gruppas da products e davart l'effect politic che duai vegnir
cuntanschì tar mintga gruppa da products dals singuls posts da
servetsch. Questas gruppas da products e quests effects ston vegnir
concludids dal cussegl grond. En quest connex è la structura da las
gruppas da products impurtanta tant enavant, ch'il cussegl grond
fixescha en l'avegnir ils preventivs globals sin questa basa. Cun
formular l'effect determinescha il parlament ultra da quai la direcziun,
en la quala las prestaziuns da l'administraziun duain ir.
La cuntraproposta tar l'iniziativa dal pievel "Gea a la medischina
cumplementara" vegn sustegnida
La regenza grischuna sustegna la cuntraproposta tar l'iniziativa dal
pievel "Gea a la medischina cumplementara" ch'è vegnida concludida dal
cussegl dals chantuns. La cuntraproposta dal cussegl dals chantuns mussa
la via per renconuscher la medischina cumplementara sin il stgalim da la
constituziun. Sche l'iniziativa vegniss acceptada, chaschunass ella
custs enorms en ils fatgs da sanadad pervia da sia pretensiun
cumplessiva, constatescha la regenza en sia posiziun envers la cumissiun
per segirezza sociala e sanadad dal cussegl naziunal.
La regenza è da princip d'accord cun la revisiun parziala da la
lescha davart l'assicuranza cunter la dischoccupaziun
La regenza grischuna è da princip d'accord cun la revisiun parziala
da la lescha davart l'assicuranza cunter la dischoccupaziun che vegn
proponida da la confederaziun. Ella approvescha l'intenziun da basar
l'assicuranza cunter la dischoccupaziun da nov sin in dumber da persunas
dischoccupadas da 125'000. Il project ha ultra da quai la finamira da
reducir ils debits ch'èn s'accumulads tar il fond per persunas
dischoccupadas e da garantir la finanziaziun a lunga vista. Questas
finamiras duain vegnir cuntanschidas tras respargns en la dimensiun da
480 milliuns francs sco er tras entradas supplementaras da quasi la
medema dimensiun. Uschia è la regenza perencletga che per cuntanscher
ina finanziaziun da lunga vista duai vegnir augmentada la deducziun
ordinaria dal salari da 2.0 sin 2.2. pertschient. Per pudair reducir ils
debits approvescha ella medemamain la proposta d'introducir in augment
limità da la tariffa da contribuziun da 2.2. sin 2.4 pertschient.
Da vischnancas e da regiuns
- Mastrils: La revisiun parziala da la constituziun communala da la
vischnanca da Mastrils, concludida da la radunanza communala dals 23 da
november 2007, vegn approvada.
- Preaz: La revisiun parziala da la constituziun communala da la
vischnanca da Preaz, concludida da la radunanza communala dals 12 da
december 2007, vegn approvada.
- Igis: La revisiun parziala da la lescha da construcziun da la
vischnanca dad Igis, concludida ils 25 da november 2007, vegn approvada
cun ina correctura.
- Schlarigna: La revisiun parziala da la lescha da construcziun da la
vischnanca da Schlarigna, deliberada ils 23 d'avrigl 2007, vegn
approvada cun la remartga che la vischnanca vegnia puspè a stuair
suttametter - tut tenor il resultat dal plan directiv regiunal - sia
lescha da construcziun ad ina revisiun, e quai pertutgant las
regulaziuns davart la construcziun d'abitaziuns secundaras.
- Pratval: La revisiun totala da la planisaziun locala da la
vischnanca da Pratval dals 12 da november 2007 vegn approvada.
Contribuziuns chantunalas a differentas instituziuns
- Binaris da colliaziun a Favugn: Per construir ils binaris da
colliaziun da la Kuoni SA a Favugn vegn garantida ina contribuziun
chantunala da maximalmain 503'568 francs.
- Societad da musica da Roveredo: A la societad da musica da Roveredo
vegn concedida ina contribuziun maximala da 12'300 francs per
in'unifurmaziun nova.
Projects da vias
La regenza ha approvà totalmain 9'980'000 francs per construir e per
sanar ils suandants trajects da vias:
- via d'Avras: lavurs d'impressari punt Parsagna; chasa Juppa -
Podestatsch; chant da la val di Lei
- via sursilvana: lavurs d'impressari Garmischeras -
Tscheppa; entaifer il vitg da Sumvitg
- via sursilvana da la vart dretga dal Rain: lavurs
d'impressari Versomi - Valendau
- via d'Engiadina: lavurs d'impressari punt Pedra
- via da St. Antönien: lavurs d'impressari, dustanza dal
Schanielbach
- via da Mut: lavurs d'impressari entaifer il vitg da Mut
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun