Cuntegn da la pagina

La cumissiun predeliberanta dal cussegl grond beneventa l'engrondiment da la scola auta da pedagogia

  • Erste Mitteilung
  • Neuen Beitrag einfügen
La cumissiun predeliberanta dal cussegl grond ch'è vegnida nominada aposta per quest intent ha predeliberà per mauns dal cussegl grond la missiva da la regenza davart l'engrondiment da la scola auta da pedagogia (SAPGR). La cumissiun vegn presidiada dal deputà Andreas Felix.
La SAPGR ha surpiglià l'onn 2003 las localitads da l'anteriura scola da dunnas sin l'areal dal Kantengut. Dapi quella giada porscha ella là sco suletta instituziun dal chantun Grischun scolaziuns per persunas d'instrucziun. Ils edifizis da scola che tutgan ussa a la SAPGR èn vegnids construids ils onns 1981 fin 1983 per ils basegns che la scola da dunnas aveva quella giada. Quests edifizis n'èn betg pli en cas d'ademplir las pretensiuns da la didactica e da la gestiun che valan ozendi. Dapi l'onn 2005 è la SAPGR sfurzada da prender a tschains locals externs decentrals en la citad da Cuira. La mediateca da la SAPGR ha ses domicil en in provisori. Quai chaschuna relaziuns che n'èn betg cuntentaivlas (fradaglia, chalur, penetraziun d'aua, sch'i plova fitg).
Il project qua avant maun, planisà tenor il standard da minergia, prevesa - ultra da la construcziun da dus auditoris, en ils quals mintgamai in'entira annada da scolaziun po vegnir instruida - plinavant da construir ina nova mediateca. Quest engrondiment è necessari per che la SAPGR possia ademplir sias incumbensas en moda effizienta e favuraivla. El vegn a chaschunar custs da 5,8 milliuns francs.
La cumissiun è sa fatschentada detagliadamain cun il project e cun la necessitad da l'engrondiment. Ella è arrivada unanimamain a la conclusiun da recumandar al cussegl grond d'acceptar il project che vegn proponì en la missiva. Il cussegl grond vegn a tractar quest project durant la sessiun d'avrigl 2008.

Gremi: cumissiun predeliberanta per l'engrondiment da la SAPGR
Funtauna: rg cumissiun predeliberanta per l'engrondiment da la SAPGR
Neuer Artikel