La regenza grischuna supplitgescha il cussegl federal da superar la crisa en il cas da las VFF cargo. Sco che la regenza menziunescha en ina brev al cussegl federal, ston las schanzas ch'èn avant maun vegnir nizzegiadas per evitar in'ulteriura escalaziun en las cuntraversas dals partenaris socials pervia dals lavuratoris da las viafiers federalas (VFF) a Bellinzona.
En sia brev conferma la regenza ses puntg da vista ch'il cussegl federal haja ina responsabladad speziala en sia rolla sco proprietari da las VFF e sco autoritad electorala dal cussegl d'administraziun da las VFF. Quai vul dir d'ina vart da radunar - sin la via instradada envers ina soluziun constructiva - ils partenaris socials ad ina maisa e da l'autra vart d'examinar tut las pussaivladads che la confederaziun ha per dar sustegn a las regiuns pertutgadas da Bellinzona e dal Moesano. La finamira duai - tenor la regenza - esser quella da mantegnair e da stgaffir plazzas da lavur en ina regiun che ha structuras deblas.
Gia il cumenzament da mars aveva la regenza exprimì ses displaschair e sia consternaziun davart l'annunzia che plazzas da lavur da la VFF cargo a Bellinzona duajan vegnir stritgadas. In represchentant da la regenza è stà al lieu ed ha sustegnì la delegaziun tessinaisa a chaschun d'ina discussiun che ha gì lieu a Berna.

Gremi: regenza
Funtauna: rg chanzlia chantunala dal Grischun