Cuntegn da la pagina

La regenza exprima sia critica davart il segund pachet d'ordinaziuns da la politica agrara federala 2011

  • Erste Mitteilung
  • Neuen Beitrag einfügen
En sia posiziun crititgescha la regenza intgins puncts dal segund pachet d'ordinaziuns per la realisaziun da la politica agrara federala 2011 (PA 2011). L'element central da la PA 2011 è la reducziun dal sustegn ch'è lià a products e la transfurmaziun dals meds finanzials en pajaments directs. Il segund pachet d'ordinaziuns prevesa da midar davent da contribuziuns che sa basan sin la surfatscha vi a contribuziuns che sa basan sin il dumber d'animals. La regenza refusa dentant questa midada, perquai che quai promova la producziun. La producziun duess percunter plitost vegnir dirigida dal martgà.
La regenza è dentant er dischillusa, perquai che la confederaziun prevesa per l'onn 2009 damain meds finanzials che quai ch'il parlament aveva concedì. La finala fa la regenza fitg gronds quitads per il svilup da l'agricultura alpina - in bain cultural ch'exista dapi 4000 onns en il Grischun. Tras las disposiziuns davart las contribuziuns che sa basan sin il dumber d'animals è l'agricultura alpina tradiziunala en privel da svanir fin sin autezzas da 1600 meters. La confederaziun vegn dumandada da porscher ina soluziun en quest connex. Uschiglio vegnan da princip beneventadas las mesiras a favur dal territori da muntogna e las midadas en l'ordinaziun concernent la banca da datas davart il traffic cun animals.

La revisiun parziala da la lescha davart la perscrutaziun vegn beneventada
La regenza grischuna sustegna la revisiun parziala planisada da la lescha federala davart la perscrutaziun. Il punct central da la revisiun parziala prevesa da reglar en moda moderna e cumplessiva la promoziun da l'innovaziun. En la lescha vegnan plinavant francadas las activitads da la confederaziun per promover il spiert d'interpresa e per stabilir interpresas che lavuran en la perscrutaziun.
La lescha saja fitg impurtanta per il chantun Grischun, perquai ch'ella permettia da finanziar ils differents instituts da perscrutaziun ch'èn domiciliads en il chantun sco er lur activitads da perscrutaziun, scriva la regenza en sia resposta da consultaziun. En il svilup che la societad fetschia actualmain en direcziun d'ina societad che sa basa sin l'infurmaziun, sajan avant maun las meglras premissas per domiciliar en il Grischun ulteriurs instituts da perscrutaziun che han ina renconuschientscha mundiala. La regenza crititgescha dentant ch'i manchia ina regulaziun davart la persistenza en la lescha davart la perscrutaziun.

Da vischnancas e da regiuns
Sched, Tràn, Tumegl, Veulden: La cunvegna che las vischnancas da Sched, da Tràn, da Tumegl e da Veulden han concludì ils 13 da december 2007 per fusiunar las vischnancas a la nova vischnanca da Tumegl, vegn approvada.
Scanvetg central: Il nov statut d'organisaziun dal consorzi da scola dal Scanvetg central vegn approvà.
Val Puschlav: Il chantun Grischun sa participescha cun 50'000 euros sco associà finanzial a la societad cooperativa dal center d'innovaziun da la Vuclina (polo dell'Innovazione della Valtellina, politec Sondrio). Tras il project, dal qual er la regiun da la Val Puschlav fa part, duai avair lieu in viv barat da know-how tras la colliaziun transcunfinala d'interpresas ed uschia sa sviluppar in clima per innovaziuns e per novas tecnologias.
Samedan: La revisiun parziala da la planisaziun locala "Isla da Sax" e "Via Retica" da la vischnanca da Samedan dals 13 da december 2007 vegn approvada.
Zernez: La revisiun parziala da la planisaziun locala "Crastatscha" da la vischnanca da Zernez dals 25 da zercladur 2007 vegn approvada.
Tavau: Per ils custs per construir e per sanar la via champestra "Wissigen Boden" vegn garantida a la vischnanca da Tavau ina contribuziun chantunala da maximalmain 278'289 francs.
Tavau: Per il project per sanar ils rempars da lavinas "Schiahorn" da la vischnanca da Tavau vegn garantida ina contribuziun chantunala da 433'100 francs.
Val Schons: Al consorzi per aua persa da la Val Schons vegn concedida ina contribuziun da 101'261 francs per cumplettar l'edifizi e las maschinas da la serenera.
Tour de Suisse: L'organisatura dal tour de Suisse survegn la permissiun d'utilisar ils 17 ed ils 18 da zercladur 2008 la ruta ch'è previsa en il chantun Grischun tenor il plan da traject per il tour de Suisse 2008.
Swiss-Bike-Masters: L'organisatura dal "Swiss-Bike-Masters" survegn la permissiun d'utilisar ils 19 ed ils 20 da fanadur 2008 la ruta ch'è previsa tenor il plan da traject en il territori dal Partenz.

Contribuziuns chantunalas a differentas instituziuns
Promoziun da la cultura: La regenza ha concedì contribuziuns da totalmain 316'500 francs per promover 21 occurrenzas ed ovras culturalas.
Fundaziun per sport da prestaziun a Tavau: Per stabilir il center naziunal per sport da prestaziun da Swiss ski, ski alpin ost, a Tavau survegn la fundaziun per sport da prestaziun a Tavau ina contribuziun da 400'000 francs or dal fond da sport.
Festa da la staziun da Cuira: Dals 23 fin ils 25 da matg 2008 ha lieu la festa da la staziun da Cuira a chaschun da l'inauguraziun e da la reavertura da la staziun sco er dal giubileum da 150 onns dal traject Rheineck - Cuira. Questa festa vegn sustegnida cun ina contribuziun da maximalmain 100'000 francs.
Publicaziun da "Top-Chance Mehrsprachigkeit": La translaziun e la producziun da la publicaziun tudestga "Top-Chance Mehrsprachigkeit" en rumantsch ed en talian vegn sustegnida cun 50'000 francs.
Circus d'uffants Lollypop: Per ses program da l'onn 2008 survegn il circus d'uffants Lollypop ina contribuziun chantunala en l'autezza da 45'000 francs.
Prosopografia da la claustra Son Jon a Müstair: Al project da perscrutaziun "Prosopografia da la claustra Son Jon a Müstair" vegn concedida ina contribuziun unica da 15'000 francs.
Monografia davart la cheramica classica e hellenistica ad Eretria: Per ils custs per repassar il manuscrit d'ina monografia da dr. Ingrid Metzger davart la cheramica classica e hellenistica ad Eretria sco er per preparar la stampa da quest manuscrit vegn pajada ina contribuziun da 10'000 francs.
Uniun d'agid umanitar per la Russia: Per la 17avla missiun d'agid da l'uniun d'agid umanitar per la Russia vegn concedida ina contribuziun da 30'000 francs.

Projects da vias
La regenza ha approvà totalmain 30'927'000 francs per construir e per sanar ils suandants trajects da vias:
- via naziunala A13: lavurs d'impressari, Ponte Rivana; lavurs da siglientar, Pian San Giacomo - Malabarba; lavurs d'inschigneria, guaud da Cassana sid - colliaziun da Nufenen; installaziuns electricas, guaud da Cassana
- via da l'Alvra: lavurs da cuvrida, Alvagni Bogn - Bellaluna
- via da Brinzauls: lavurs da cuvrida, Lantsch - Brinzauls
- via da Calanca: lavurs d'impressari, Ponte Tiieda
- via d'Engiadina: lavurs da construcziun e da cuvrida, Lavin - Giarsun
- via dal Flüela: lavurs d'impressari, Tufflischbach - Alpenrose
- via dal Landwasser: lavurs d'impressari, galarias da lavinas Rotsch/Taferna
- via da la Lumnezia: lavurs d'impressari, Glion - Cumbel; Lumbrein - Vrin
- via dal Luzisteig: lavurs da cuvrida, Landquart - spartavias per Jenins
- via da Sursaissa: lavurs d'impressari, Glion - Flond
- via dal pass dal Fuorn: lavurs d'impressari e lavurs da cuvrida, Ova dal Sagl - Laschadura
- access a la via dal Partenz: lavurs da cuvrida, via da Raggalia/Aschüel; lavurs d'impressari e lavurs da cuvrida, punt a spunda
- via sursilvana da la vart dretga dal Rain: lavurs da cuvrida, Versomi - Valendau
- via da Schuders: lavurs d'impressari, Schibabüel - Montagna, Schiers
- via da Val S. Pieder: lavurs d'impressari, Glion - Uors

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel