La taxa turistica chantunala (TTC) remplazza las taxas communalas da
cura e las taxas communalas per promover il turissem da fin ussa e gida
a consolidar la refurma da las structuras dal turissem grischun. Ella
duai vegnir incassada a partir da l'onn 2010 en tut il Grischun. La
refurma da las structuras vegn gia realisada cun 14 projects regiunals.
Ina nova broschura da l'uffizi per economia e turissem (UET) dat ina
survista.
Cun la nova structura da las destinaziuns, cun ina clera repartiziun
da las incumbensas en il marketing e cun la nova orientaziun da Grischun
vacanzas ha la refurma dal turissem grischun la finamira da franar la
diminuziun da las pernottaziuns en il Grischun. Tras la repartiziun da
las incumbensas ston las organisaziuns turisticas existentas fusiunar ad
organisaziuns per la gestiun da destinaziuns (OGD) u ad organisaziuns
turisticas futuras (OTF). A chaschun d'ina orientaziun a las medias han
il cusseglier guvernativ Hansjörg Trachsel e l'uffizi per economia e
turissem infurmà davart la concepziun da la TTC e davart il stadi
intermediar da la refurma.
La TTC a favur dal turissem
La TTC planisada porscha al turissem las cundiziuns generalas per
pudair agir tenor princips d'interpresa e tenor ils basegns dal martgà,
suenter che las structuras èn adattadas. La TTC porta trais avantatgs
essenzials en cumparegliaziun cun la situaziun actuala: Primo vegnan las
taxas communalas da cura e las taxas communalas per promover il turissem
remplazzadas tras in sistem chantunal che vala en l'entir Grischun e che
pussibilitescha d'impunder ils meds finanzials en moda pli flexibla per
incumbensas da marketing e d'infrastructura. Secundo pon ils meds
finanzials vegnir augmentads dad actualmain 44,6 a 58,5 milliuns francs
e terzo datti in potenzial da spargn considerabel tar l'incasso. Suenter
che l'organisaziun da tetg da las federaziuns economicas è s'exprimida
da princip en moda positiva davart la TTC, vegnan examinadas las
cundiziuns ch'èn vegnidas fatgas. Quai èn cunzunt la pretensiun da las
impressarias e dals impressaris per ina grevezza degressiva, plinavant
la limitaziun temporara e la determinaziun dal cuntegn da la controlla
da l'effect e la finala la participaziun finanziala dal chantun. Fin il
november 2008 duai il sboz da la lescha e da l'ordinaziun esser elavurà,
a partir dal schaner 2009 duai el alura ir en consultaziun. Sin quai
elavura la regenza la missiva. Suenter la deliberaziun dal cussegl grond
en la sessiun d'avust 2009 èsi planisà d'introducir la TTC il schaner
2010.
Derivanza e diever dals meds finanzials
Tar la TTC duai il mastergn sa participar da nov cun 9,1 empè da 4,1
milliuns francs vi da la finanziaziun dal turissem. 3 milliuns francs da
las entradas supplementaras vegnan cuntanschids en la Val dal Rain
grischuna e 2 milliuns francs en il rest dal chantun. Sco furnitura da
prestaziuns preliminaras per il turissem cuntanscha la Val dal Rain
grischuna la valurisaziun turistica la segund auta en il chantun; fin
ussa n'ha ella dentant strusch stuì pajar taxas communalas, perquai che
quellas eran bassas u mancavan insumma. Las abitaziuns da vacanzas
contribueschan da nov almain 27,4 empè da 21 milliuns francs; las valurs
effectivas èn chaussa d'ulteriuras coordinaziuns. L'hotellaria ed ils
ulteriurs alloschaments pajan 22 empè da 19,5 milliuns francs. Perquai
che las capacitads e betg las pernottaziuns cuntanschidas èn da nov
suttamessas a la taxa, vegnan remunerads quellas locaturas u quels
locaturs che lavuran cun success. Tut en tut resultan uschia mintga onn
13,9 milliuns francs dapli per il turissem. Er tar il nov sistem da la
TTC vegnan ils meds finanzials ch'èn vegnids cuntanschids fin ussa
restituids cumplainamain a las regiuns. Tar ils meds finanzials che
vegnan generads supplementarmain vegni examinà, sch'els duessan vegnir
impundids per regiuns ch'èn vegnidas restructuradas cun success, per
Grischun vacanzas ubain per projects chantunals.
Simpel, gist ed universal
La TTC duai vegnir introducida en moda simpla, gista ed universala.
Ella augmenta la cumpetitivitad da las regiuns e promova persistentamain
l'innovaziun e la prontezza da cooperar. Ella n'è betg ina nova taglia,
mabain remplazza las soluziuns communalas da fin ussa tras in sistem
chantunal. Extender il circul da las contribuentas e dals contribuents e
cuntanscher a medem temp dapli meds finanzials, quai è pussaivel mo,
sch'er l'economia vegn integrada. Tut ils secturs economics che
profiteschan dal turissem contribueschan pia lur part tras la TTC.
L'autezza da la TTC sa drizza tenor il niz regiunal, tenor il grad che
la branscha dependa dal turissem sco er tenor la valurisaziun da la
branscha. Las datas ch'i dovra per quest intent èn vegnidas eruidas da
la scola auta da tecnica ed economia (SATE) a Cuira en in studi davart
la valurisaziun. Per il mument vegnan ellas actualisadas anc ina giada.
Per fixar la valurisaziun serva ina pauschala da basa e - tar il
mastergn - la summa dals salaris tenor la AVS, tar ils alloschaments
supplementarmain il dumber da chombras e tar las abitaziuns da vacanzas
la surfatscha en meters quadrat. Per purschidas d'infrastructura
spezialas, sco p.ex. telefericas gratuitas, bus da sport e.u.v., duain
las vischnancas plinavant pudair incassar supplements individuals.
Mesiras accumpagnantas
Tut en tut sustegna il chantun la refurma dal turissem cun tschintg
mesiras accumpagnantas. Il concept da realisaziun da la plattafurma
turistica electronica dal Grischun è fatg e la fasa iniziala cun las
organisaziuns partenarias è finanziada. Il sistem da direcziun e da
monitoring "balanced scorecard" (BSC) è introducì tar Tavau turissem e
tar Grischun vacanzas. El vegn er duvrà da l'uffizi per economia e
turissem per mesirar l'efficacitad da la refurma dal turissem e vegn
realisà tar tut las OGD fin l'onn 2009. Il rapport da basa davart la
strategia per il turissem en accord cun la natira e cun la cultura è
avant maun. Al post spezialisà per turissem e svilup persistent a
Vargistagn è vegnida surdada l'incarica da prestaziun. Tras
l'integraziun cumplaina da las destinaziuns Lai, Viamala, Partenz e
Cuira sco er tras l'integraziun d'Engiadina San Murezzan e da Tavau
Claustra en la strategia da la marca po la marca graubünden gia nudar
success impurtants. Tar ulteriuras OGD ed OTF è planisada l'integraziun.
Per motivs da prioritad n'èsi betg anc vegnì cumenzà cun la realisaziun
en il sectur da la qualitad.
14 projects regiunals
Tar ils 14 projects regiunals sa mussi ch'i dat differentas vias per
arrivar ad ina OGD u ad ina OTF. Tuttas mainan dentant da la lantschada
dal process sur la definiziun da l'orientaziun strategica e dal plan da
fatschenta tar la realisaziun e la finala tar la controlla da l'effect
cun agid da la "balanced scorecard". La OGD Engiadina San Murezzan è en
la fasa da realisaziun, il start operativ da Tavau Claustra ha lieu il
1. da matg 2008. La fundaziun da l'organisaziun turistica "regiun dal
parc naziunal" (Scuol, Val Müstair, Samignun) è previsa per il 1. da
november 2008. La OGD Surselva cun las trais OTF Flem Laax, Glion -
Sursaissa / Lumnezia - Breil-Vuorz-Andiast e Mustér Sedrun vul cumenzar
il schaner 2009 cun sia lavur operativa. Arosa e Lai fan quint da pudair
colliar lur territoris da skis a partir da l'enviern 2009/10 e vulan
integrar fin alura - gist uschia sco Cuira - las uniuns da turissem
localas en lur subregiuns. Las OTF Savognin-Surses/Val d'Alvra,
Bregaglia, Moesano, Partenz, Val Puschlav e Viamala han fatg lur plans
da fatschenta, il Scanvetg ed il Signuradi stattan anc al cumenzament
dal process.
Occurrenzas d'infurmaziun:
L'introducziun d'ina taxa turistica chantunala dovra in ferm sustegn
da tut las instituziuns e da tut las persunas participadas. Cun
occurrenzas d'infurmaziun regiunalas orientescha il chantun davart la
TTC e davart ils pass da realisaziun planisads.
- mesemna, ils 14 da matg 2008, a Glion
- mardi, ils 20 da matg 2008, a Domat
- mesemna, ils 21 da matg 2008, a Tavau
- glindesdi, ils 2 da zercladur 2008, a Vulpera
- mesemna, ils 4 da zercladur 2008, a San Murezzan
- mardi, ils 17 da zercladur 2008, a Landquart
- mesemna, ils 18 da zercladur 2008, a Cuira
Gremi: departament d'economia publica e fatgs socials
Funtauna: rg departament d'economia publica e fatgs socials