Cuntegn da la pagina

La cumissiun sustegna il rapport davart il program da construcziun da vias 2009 - 2012

  • Erste Mitteilung
  • Neuen Beitrag einfügen
La cumissiun dal cussegl grond per ambient, traffic ed energia ha tractà il rapport da la regenza davart il program da construcziun da vias 2009 - 2012 ed ha prendì enconuschientscha da tal en moda affirmativa. A la sesida da la cumissiun è sa participà er il president da la regenza Stefan Engler.
Cun quest rapport - che vegn suttamess per l'emprima giada en questa furma al cussegl grond - mussa la regenza, nua ch'ella vul metter ils accents en il sectur da las vias per ils onns 2009 fin 2012. Per ch'ils meds finanzials che stattan a disposiziun per la construcziun da vias possian vegnir impundids er a lunga vista en moda optimala, prenda la regenza en mira dus intents strategics surordinads. La finamira è quella da differenziar la qualitad da l'avertura ed il grad da construcziun tenor las pretensiuns dal territori avert, e quai sin basa da sia utilisaziun, e d'optimar l'impundaziun dals meds finanzials.
Per cuntanscher quests intents strategics surordinads ha la regenza fixà trais finamiras d'effects: sco emprim duai vegnir mantegnida resp. augmentada la qualitad da l'avertura, sco segund duai vegnir reducida la grevezza per l'ambient e sco terz duai vegnir augmentada la segirezza sin las vias. Per realisar questas finamiras han las prioritads vertentas stuì vegnir examinadas e fixadas da nov. En l'avegnir vegnan las prioritads messas er tar las vias principalas pli fitg sin l'utilisaziun e betg - sco fin ussa - sin ils custs. Per la regenza resulta uschia la suandanta priorisaziun tar l'attribuziun dals meds finanzials per la construcziun da vias: 1. mantegniment da las vias (mantegniment architectonic urgent per garantir la segirezza e l'utilisabladad da las vias); 2. reparaziun da las vias (sanaziun e renovaziun parziala); 3. construcziun da vias novas e renovaziun da las vias. Per ils onns 2009 fin 2012 èn planisads 292 milliuns francs (73 milliuns francs per onn) per il mantegniment architectonic da las vias principalas e da las vias da colliaziun e 348 milliuns francs per la construcziun e per la renovaziun da las vias principalas e da las vias da colliaziun.
Suenter avair examinà e discussiunà detagliadamain il rapport ha la cumissiun suandà las propostas da la regenza ed ha deliberà unanimamain il rapport en il senn da la regenza per mauns dal cussegl grond. Per sia valitaziun ha la cumissiun er sa laschà persvader da l'idea che l'infrastructura da traffic saja dependenta da cundiziuns generalas ch'èn fixadas a vista mesauna fin a lunga vista e plinavant ch'il program da construcziun da vias da 4 onns e che la planisaziun da finanzas correspundian a questa pretensiun. Il cussegl grond ha la pussaivladad da prender enconuschientscha dal rapport en la sessiun da zercladur 2008.

Gremi: cumissiun per ambient, traffic ed energia
Funtauna: rg cumissiun per ambient, traffic ed energia
Neuer Artikel