Il motiv per la muria da peschs dals 16 d'avrigl 2008 en il Rain anteriur, al lieu nua ch'i sbucca l'aua persa dal plazzal da la NEAT, è sclerì. Per reducir il nitrit ch'è cuntegnì en l'aua persa dal tunnel, è vegnì installà in indriz per tractar preliminarmain l'aua persa, en il qual il nitrit vegn eliminà cun aua da javel. Perquai che la dosa da l'aua da javel è stada memia gronda, è aua che cuntegneva fitg bler clor activ arrivada en il Rain.
Durant las lavurs da revisiun annualas en la galaria senza pressiun da las ovras electricas dal Rain anteriur na po l'aua persa dal tunnel betg vegnir deviada sur il conduct da la galaria. Questa revisiun dura dus fin trais dis. Per quest temp sto l'aua persa dal tunnel vegnir inducida en il Rain anteriur. Avant l'inducziun sto vegnir reducì il nitrit ch'è cuntegnì en l'aua. Per quest intent vegn agiuntada aua da javel a l'aua persa. L'aua da javel transfurma il nitrit ch'è tissi per ils peschs, en nitrat. Sch'i vegn agiuntada ina dosa memia gronda d'aua da javel, arriva clor activ en il Rain. Aua da javel vegn duvrada savens sco med per dischinfectar e per sblatgir. Il clor ch'ella cuntegna è fitg ferm tissi per ils peschs.
Las analisas da las provas d'aua ch'èn vegnidas prendidas al lieu da l'inducziun han mussà valurs da clorid fermamain levadas. Da quai pon ins concluder che la dosa da l'aua da javel è stada memia gronda. Durant in temp indefinì è pia arrivada aua che cuntegneva clor activ en il Rain anteriur a Sedrun. Il motiv da questa dosa memia gronda n'ha anc betg pudì vegnir eruì. El è l'object da l'inquisiziun che vegn fatga. L'accident dals 16 d'avrigl ha gì per consequenza ch'ins ha chattà totalmain circa 900 litgivas d'aual mortas. Ina pestga posteriura da controlla ha mussà che sin in traject da circa 6 kilometers n'han ins pudì constatar pli nagins peschs vivs.
Gia avant dus onns è capità in accident sumegliant sin il plazzal da la NEAT. Quella giada era aua persa ch'era vegnida tractada preliminarmain - pervi d'ina communicaziun manglusa - arrivada en la galaria senza pressiun da las ovras electricas dal Rain anteriur, cumbain che la serra da svidada per il Rain da Nalps era anc averta. Per var duas uras è currida uschia aua cun fitg bler nitrit en il Rain da Nalps. Ina da las mesiras per evitar tals accidents en il futur è stada d'equipar l'indriz per tractar preliminarmain l'aua persa cun in apparat da dosar l'aua da javel, che vegn duvrada per reducir il nitrit.
En il center da las activitads stattan las mesiras da l'uffizi da chatscha e pestga per repopular l'aua cun peschs. Las schanzas paran d'esser bunas, basegnan dentant 3 fin 4 onns.

Gremi: uffizi per la natira e l'ambient
Funtauna: rg uffizi per la natira e l'ambient