Cuntegn da la pagina

Rumantsch grischun en scola: 11 vischnancas da piunier supplementaras per l'onn da scola 2008/2009

  • Erste Mitteilung
  • Neuen Beitrag einfügen
En la regiun da Glion han gì lieu dacurt las ultimas votaziuns davart l'introducziun dal rumantsch grischun sco lingua da scola activa per l'onn da scola 2008/2009. En tut èn 11 vischnancas sa decididas per quest termin d'introducziun.

La radunanza da las abitantas e dals abitants da Glion ha decidì il matg 2007 da manar la nova "scola bilingua" per tudestg e per rumantsch grischun. L'atun 2007 e l'enviern 2007/2008 han alura ulteriuras scolas primaras ed ulteriurs consorzis da scola primara en il conturn da Glion votà davart l'introducziun dal rumantsch grischun sco lingua da scola. Tar las 23 vischnancas da fin ussa vegnan vitiers l'onn da scola 2008/2009 tut en tut 11 novas vischnancas da piunier: Glion, Schnaus, Flond, Schluein, Pitasch, Riein, Sevgein, Castrisch, Surcuolm, Luven e Duin. En las radunanzas communalas respectivas ha il consentiment al rumantsch grischun importà var 86 pertschient en media. Actualmain ha lieu a Glion la furmaziun supplementara da las persunas d'instrucziun da questas novas vischnancas da piunier.
Durant l'onn da scola current fan las 23 vischnancas da piunier da l'onn 2007/2008 (Val Müstair, Grischun central sco er Trin, Laax e Falera) las emprimas experientschas praticas cun il rumantsch grischun sco lingua d'alfabetisaziun. Las persunas d'instrucziun respectivas vegnan accumpagnadas didacticamain e termineschan lur scolaziun la proxima stad cun in'emna d'approfundaziun. Alura è er previsa in'evaluaziun da las emprimas experientschas en l'instrucziun. Per il nov onn da scola stattan a disposiziun ils novs meds d'instrucziun per la 2. classa (instrucziun da lingua e matematica, plinavant emprims moduls per uman ed ambient).
Per l'introducziun dal rumantsch grischun per l'onn da scola 2009/2010 èn s'interessadas fin ussa 6 vischnancas: Sagogn, Rueun, Siat, Pigniu, Vuorz ed Andiast. La radunanza communala da Sagogn è sa decidida gia il mars 2008 a favur da questa varianta. En las 5 ulteriuras vischnancas han gì lieu dacurt occurrenzas d'infurmaziun. Las votaziuns èn previsas per l'atun 2008.

Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient
Neuer Artikel