La cumissiun per ambient, traffic ed energia dal cussegl grond è sa fatschentada intensivamain a chaschun da l'ultima sesida - en preschientscha da represchentantas e da represchentants da l'uffizi chantunal d'energia e da traffic - cun la problematica da construir en moda persistenta, quai vul dir en spezial cun la dumonda da construir edifizis en moda effizienta areguard l'energia. En ina incumbensa che la cumissiun vegn ad inoltrar durant la sessiun da favrer, intimescha ella la regenza d'elavurar ina legislaziun d'energia ecologica ed exemplarica, ch'è economicamain supportabla e ch'è tecnicamain realisabla. La legislaziun duai s'orientar a las tecnologias ch'èn disponiblas ozendi.
Tenor l'avis unanim da la cumissiun è la part d'ieli mineral ch'il Grischun dovra per cuvrir ses basegn d'energia memia auta. L'ieli mineral vegn proximamain pli stgars ed uschia sensiblamain pli char. 45 pertschient da nossa energia en Svizra vegn producida surtut cun ieli mineral. Schebain che la durada media da las uras suleglivas en il Grischun è auta, na vegn quest fatg betg tratg a niz avunda per construir qua tar nus. Cun l'isolaziun da blers edifizis novs e sanads na statti betg uschè bain en il Grischun. Sch'i na capita betg proximamain insatge en quest sectur, vegn il Grischun - il chantun turistic ch'è enconuschent per sia architectura - a construir chasas che vegnan ad esser per 50 onns lunsch sut il standard da construcziun da lur temp e che vegnan ad engrevgiar vinavant en moda disproporziunada nossa bilantscha dal CO2.
La cumissiun s'engascha per ch'il chantun promovia pli fitg il construir edifizis en moda effizienta areguard l'energia. Senza impuls da vart da la planisaziun dal territori e senza ina motivaziun finanziala per sanaziuns e per edifizis novs, vegni a capitar pauc fin nagut sin il martgà da construcziun. Per ch'i dettia ina motivaziun per l'industria da construcziun da sa scolar en las novas tecnicas per l'effizienza da l'energia, dovri a lunga vista la tschertezza che tecnicas per construir edifizis en moda effizienta areguard l'energia vegnan ad esser inevitablas per cuntanscher las valurs minimalas. Perquai duain valurs che pon vegnir cuntanschidas tecnicamain senza problems er vegnir perscrittas da la lescha, sco quai ch'igl è usità gia oz. Tenor la cumissiun duai il maun public avair ina funcziun d'exempel e vulair cuntanscher - en connex cun l'energia - almain il stadi che vegn prendì en mira sin livel federal.

Gremi: cumissiun per ambient, traffic ed energia
Funtauna: rg cumissiun per ambient, traffic ed energia