Cuntegn da la pagina

La refurma dal turissem sin tura d'infurmaziun

  • Erste Mitteilung
  • Neuen Beitrag einfügen
Cun l'introducziun d'ina lescha chantunala da turissem duai la finanziaziun dal marketing e da la purschida turistica vegnir messa sin in fundament pli vast e pli stabil. Ella duai remplazzar a partir da l'onn 2010 passa 100 leschas localas da turissem e consolidar la refurma dal turissem grischun areguard las finanzas ed areguard las structuras. Il cusseglier guvernativ Hansjörg Trachsel ed il manader da l'uffizi per economia e turissem, Eugen Arpagaus, sa mettan a disposiziun - a chaschun d'occurrenzas d'infurmaziun en las regiuns - per respunder dumondas da las interpresas grischunas, da las turisticras e dals turistichers sco er da las persunas interessadas.
Cun la nova structura da las destinaziuns, cun ina clera repartiziun da las incumbensas en il marketing e cun la nova orientaziun da Grischun vacanzas ha la refurma dal turissem grischun la finamira da franar la diminuziun da las pernottaziuns en il Grischun. Tras la repartiziun da las incumbensas ston las organisaziuns turisticas existentas fusiunar ad organisaziuns per la gestiun da destinaziuns (OGD) u ad organisaziuns turisticas futuras (OTF). La realisaziun sa sviluppa bain cun 14 projects regiunals. Ina nova broschura da l'uffizi per economia e turissem dat ina survista.

Tura d'infurmaziun tras il chantun
Per introducir la taxa turistica chantunala (TTC) basegni l'emprim ina buna infurmaziun da la basa per mussar ils avantatgs da la TTC. Cun occurrenzas regiunalas orientescha il chantun davart la TTC e davart ils pass da realisaziun planisads. Questas occurrenzas duran mintgamai da las 18.00 fin ca. las 20.00 ed han lieu a las suandantas datas: mesemna, ils 14 da matg 2008, en la chasa communala a Glion; mardi, ils 20 da matg 2008, en la sala polivalenta Tircal a Domat; mesemna, ils 21 da matg 2008, en il center da congress a Tavau; glindesdi, ils 2 da zercladur 2008, en l'hotel Villa Post a Vulpera; mesemna, ils 4 da zercladur 2008, en l'hotel Laudinella a San Murezzan; mardi, ils 17 da zercladur 2008, en il Forum im Ried a Landquart e mesemna, ils 18 da zercladur 2008, en l'edifizi dal cussegl grond a Cuira. Las occurrenzas èn publicas. Per motivs organisatorics vegn giavischada in'annunzia sut www.awt.gr.ch u sut il numer da telefon 081 257 23 42. La nova broschura po er vegnir retratga là.

La TTC a favur dal turissem
La TTC porscha al turissem las cundiziuns generalas per pudair agir tenor princips d'interpresa e tenor ils basegns dal martgà, suenter che las structuras èn adattadas. La TTC porta trais avantatgs essenzials en cumparegliaziun cun la situaziun actuala: Primo vegnan las taxas communalas da cura e las taxas communalas per promover il turissem remplazzadas tras in sistem chantunal che vala en l'entir Grischun e che pussibilitescha d'impunder ils meds finanzials en moda pli flexibla per incumbensas da marketing e d'infrastructura. Secundo duain ils meds finanzials vegnir augmentads da 44,6 a 58,5 milliuns francs per render enconuschent la purschida turistica dal Grischun a novs giasts, e terzo datti in potenzial da spargn considerabel tar l'incasso. Suenter che l'organisaziun da tetg da las federaziuns economicas è s'exprimida da princip en moda positiva davart la TTC, vegnan examinadas las propostas e las cundiziuns ch'èn vegnidas fatgas. Quai èn cunzunt la pretensiun per ina grevezza degressiva, plinavant la determinaziun temporara e la determinaziun dal cuntegn da la controlla da l'effect e la finala la participaziun finanziala dal chantun. Fin il november duain la lescha e l'ordinaziun inclusiv la missiva esser elavuradas, a partir dal schaner 2009 duain ellas ir en consultaziun. Il cussegl grond prevesa da tractar la fatschenta en sia sessiun d'avust 2009.

Gremi: departament d'economia publica e fatgs socials
Funtauna: rg departament d'economia publica e fatgs socials
Neuer Artikel