L'iniziativa dal pievel "Scola professiunala da tgira dal Grischun a
Glion" è reussida cun 3'364 suttascripziuns valaivlas. Ils 28 d'avrigl
2008 han las represchentantas ed ils represchentants dal comité
d'iniziativa inoltrà l'iniziativa dal pievel ch'era vegnida lantschada
da la partida cristiandemocratica da la Surselva. Cun l'iniziativa ch'è
redigida en furma d'ina proposta generala pretendan las votantas ed ils
votants sutsegnads ch'i vegnian relaschadas disposiziuns legalas, las
qualas obligheschan la regenza grischuna da mantegnair e da promover
Glion, cunzunt la scola professiunala da tgira dal Grischun a Glion, er
en l'avegnir sco lieu da scolaziun e da furmaziun supplementara en il
sectur da la sanadad.
Resguardond ils termins legals vegn l'iniziativa surdada al
departament d'educaziun, cultura e protecziun da l'ambient per
l'ulteriura elavuraziun en il rom dals conclus da princip da la regenza.
Da vischnancas e da regiuns
Beiva: Il project "Rempars da lavinas Crap da Radons III" vegn
approvà cun ina contribuziun chantunala da totalmain 950'000 francs.
Puntraschigna: La regenza approvescha il project "Segirezza da la
via dal Bernina durant l'enviern" e conceda ina contribuziun da
maximalmain 990'000 francs.
- Scuol: Il project per reparar la dustanza da l'aual da la Val
Chalzina vegn approvà cun ina contribuziun da maximalmain 295'000
francs.
- Silvaplauna: La revisiun parziala da la planisaziun locala da la
vischnanca da Silvaplauna dals 27 da zercladur 2007 vegn approvada.
- Vaz: La revisiun parziala da la planisaziun locala concernent
l'abitadi da Sporz, ch'è vegnida concludida ils 16 da december 2007 da
la vischnanca da Vaz, vegn approvada parzialmain.
- "Jeantex Bike Transalp": L'organisatura da la "Jeantex Bike
Transalp" survegn la permissiun d'utilisar las rutas cun partenza e cun
arriv ad Ischgl ed a Scuol sco er a Livign, e quai glindesdi, ils 21 da
fanadur 2008, e mardi, ils 22 da fanadur 2008.
Contribuziuns chantunalas a differentas instituziuns
Pendicularas Breil-Vuorz-Andiast: Per construir la nova sutgera da
quatter da l'Alp Dado al Fil conceda la regenza ina contribuziun
chantunala da 286'000 francs.
Serenera da Tavau Glaris: Per renovar la serenera da Tavau Glaris
garantescha la regenza ina contribuziun chantunala maximala da var
113'000 francs.
Meds finanzials da la lottaria naziunala: Per las exchavaziuns da
fossils che vegnan fatgas da l'institut e dal museum paleontologic da
l'universitad da Turitg en il territori dal Ducan la stad 2008 ha la
regenza concedì ina contribuziun da maximalmain 6'500 francs.
Collecta da la rogaziun federala
Mintgamai in terz dal retgav da la collecta da la rogaziun federala
va quest onn a favur da la secziun grischuna da l'associaziun
d'alzheimer, da la fundaziun per il servetsch da pedagogia curativa dal
Grischun e da l'associaziun Fontana, Passugg.
Projects da vias
La regenza ha approvà totalmain 2'708'000 francs per construir e per
sanar ils suandants trajects da vias:
- via d'Engiadina: lavurs da construcziun, Lavin - Giarsun
- via dal Güglia: lavurs da cuvrida, Mot - Sur Gonda
Gremi: regenza
Funtauna: rg chanzlia chantunala dal Grischun