Sut il presidi dal deputà Vincent Augustin ha la cumissiun dal cussegl grond per sanadad e fatgs socials (CSF) predeliberà per mauns dal cussegl grond la missiva da la regenza tar la revisiun parziala da la lescha davart ils supplements da famiglia. A la sesida da la cumissiun è sa participà er il cusseglier guvernativ Hansjörg Trachsel.
A chaschun da la votaziun dal pievel dals 26 da november 2006 han las votantas svizras ed ils votants svizzers acceptà la lescha federala davart ils supplements da famiglia. Igl è planisà da metter en vigur questa lescha per il 1. da schaner 2009. Ils chantuns èn obligads d'adattar lur urdens da supplements da famiglia a las disposiziuns federalas il pli tard per quest termin. Cun il project da revisiun qua avant maun ademplescha il chantun Grischun questa obligaziun. Ils puncts centrals dal project èn l'integraziun parziala da persunas senza activitad da gudogn, l'integraziun da tut las lavurantas e da tut ils lavurants cun patrunas e cun patruns che n'èn betg obligads da pajar contribuziuns e la renunzia a supplements da famiglia per las persunas cun activitad da gudogn independenta.
Suenter ch'igl è stà incontestà d'entrar en chaussa, han singulas disposiziuns dal project chaschunà discussiuns cuntraversas. La cumissiun ha proponì da midar in pèr artitgels dal project. Ina minoritad da la cumissiun ha fatg la proposta da suttametter en il futur tut las persunas cun activitad da gudogn independenta che han lur domicil da fatschenta en il chantun Grischun a la lescha davart ils supplements da famiglia. In'autra proposta da minoritad vuless fixar l'import dals supplements per uffants sin almain 300 francs e l'import dals supplements per scolaziun sin almain 350 francs. La maioritad da la cumissiun suonda tar questa dumonda la proposta da la regenza, tenor la quala l'import dals supplements duai sa drizzar tenor las tariffas minimalas da la confederaziun e na duai betg esser fixà en la lescha, mabain vegnir fixà da la regenza. Qua prevesa la regenza pia da fixar - il mument che la lescha davart ils supplements da famiglia entra en vigur - ils supplements da famiglia en las disposiziuns executivas respectivas da nov sin 220 francs respectivamain sin 270 francs.
Il cussegl grond vegn a tractar quest project durant la sessiun da zercladur 2008.

Gremi: cumissiun per sanadad e fatgs socials
Funtauna: rg cumissiun per sanadad e fatgs socials