Cuntegn da la pagina

Lantschà il premi da promoziun da la pestga grischuna

  • Erste Mitteilung
  • Neuen Beitrag einfügen
Cun l'avertura da la stagiun da pestga 2008 lantscha la federaziun chantunala da pestga, ensemen cun l'uffizi da chatscha e pestga dal Grischun, per l'emprima giada il premi da promoziun da la pestga grischuna. Cun quest premi duain vegnir onuradas prestaziuns extraordinarias a favur da la pestga grischuna.
Il premi da promoziun da la pestga grischuna duai vegnir surdà per onurar engaschaments prezius en ils suandants secturs: meglierament u mantegniment da la flora e da la fauna aquatica, scolaziun da pestgadras e da pestgaders giuvens u lavur da publicitad che stat en connex cun quests dus temas. Ultra da quai duai il premi da promoziun dar in impuls da s'engaschar en moda constructiva ed innovativa per ils fatgs da la pestga.
Il premi da promoziun vegn concepì sco concurrenza, a la quala i pon sa participar persunas, gruppas da persunas u uniuns che pestgan activamain u ch'èn colliadas stretgamain cun la pestga e cun il spazi da viver dals peschs. Per sa participar a la concurrenza sto il project che duai vegnir onurà u l'activitad che duai vegnir onurada vegnir inoltrà mintgamai fin la fin da l'onn ad ina giuria d'expertas e d'experts. Questa giuria giuditgescha e ranghescha las propostas inoltradas e fixescha las singulas summas dals premis. La summa totala dals premis importa 5'000 francs per onn. La distribuziun dals premis ha mintgamai lieu a chaschun da la radunanza da las delegadas e dals delegads da la federaziun chantunala da pestga.
Ils documents d'annunzia ed ulteriuras infurmaziuns davart il premi da promoziun da la pestga grischuna sa chattan sin la pagina d'internet da la federaziun chantunala da pestga www.kfvgr.ch.

Gremi: uffizi da chatscha e pestga
Funtauna: rg uffizi da chatscha e pestga
Neuer Artikel