Cuntegn da la pagina

Strategia d'immobiglias: Ils centers administrativs rinforzan las regiuns - er a Cuira

  • Erste Mitteilung
  • Neuen Beitrag einfügen
La strategia d'immobiglias dal chantun ch'è gia vegnida realisada parzialmain metta l'accent sin ferms centers regiunals. Ussa duai vegnir realisà er a Cuira quai ch'è gia realitad en singulas regiuns: Ina gronda part da l'administraziun ch'è activa a Cuira duai vegnir concentrada en in cumplex administrativ che duai vegnir construì da nov e che duai cuntegnair circa 725 plazzas da lavur. Uschia pon vegnir tratgas a niz sinergias impurtantas e spargnads custs.
Las midadas organisatoricas sin fundament da la reorganisaziun da l'administraziun chantunala ch'è vegnida fatga l'onn 2005 dumondan novs concepts da spazi che tegnan quint da las cundiziuns ch'èn sa midadas. Suenter ina fasa da vastas analisas ha la regenza grischuna concludì l'onn 2006 da realisar la strategia d'immobiglias che l'uffizi da construcziun auta aveva sviluppà. Cun optimar il portfolio da las immobiglias, cun concentrar singulas unitads administrativas en centers regiunals e cun optimar l'utilisaziun dals locals da biro a Cuira duai vegnir creada la basa per trair a niz sinergias, per promover la flexibilitad, per meglierar la collavuraziun e per augmentar il niz per la clientella. Ina finamira centrala da la realisaziun da la strategia a Cuira è quella da reducir persistentamain ils custs dals locals.
La nova strategia d'immobiglias metta l'accent sin ferms centers regiunals. A Landquart, a Glion ed a Roveredo èn gia vegnids mess en funcziun centers administrativs regiunals. Per Cuira è vegnì integrà l'onn 2007 il concept da realisaziun sco part dal punct central da svilup "immobiglias" en il program da la regenza 2009 fin 2012.
A Cuira èn collocads ils tschintg departaments da l'administraziun chantunala en 44 differents lieus. Sut il num da project "Sinergia" vegn realisada la strategia d'immobiglias per la plazza da Cuira. Ils lieus actuals vegnan reducids per 16 objects da locaziun e per 11 agens objects. Per cuntanscher ina reducziun dals custs dals locals uschè gronda sco pussaivel e per trair a niz las sinergias impurtantas, ston vegnir collocadas las 725 plazzas da lavur ch'èn necessarias - sco gia en las regiuns - en in edifizi nov, e quai cun preferenza en in cumplex d'edifizis. Il concept da realisaziun previs permetta al chantun da construir per damaun ed en vista als proxims 50 onns. Sch'il concept vegn realisà, vegnan ils custs dals locals che resultan annualmain reducids per circa 2 milliuns francs. Sco lieu da staziunament è previs Cuira vest. Il bain immobigliar cun in'avertura excellenta che sa chatta sin l'areal da la caserna po vegnir acquistà da la confederaziun a cundiziuns favuraivlas.
Quest project dal tuttafatg economic è ina part dal program da la regenza 2009 fin 2012 che vegn deliberà en la sessiun da zercladur dal cussegl grond. Il cumenzament da l'onn 2009 èsi previs da far ina concurrenza da planisaziun per il nov edifizi administrativ. Suenter ch'il parlament ed il pievel han acceptà il project l'onn 2010, duai el vegnir realisà gia il decurs da l'onn 2011. A partir da l'onn 2014 vegni ad esser pussaivel da sa chasar en l'edifizi.

Gremi: regenza
Funtauna: rg chanzlia chantunala dal Grischun
Neuer Artikel