L'uffizi per la natira e l'ambient mesira dapi 20 onns la
contaminaziun da l'aria en il chantun Grischun. Malgrà ils progress
tecnics generals n'è il problem che l'aria da respirar è contaminada cun
pulvra fina e cun ozon betg anc schlià. L'onn passà è la contaminaziun
alura er stada memia auta tar questas substanzas nuschaivlas en l'aria,
e las limitas da l'ordinaziun per mantegnair l'aria pura èn vegnidas
surpassadas. Cunzunt durant l'enviern hai dà grondas contaminaziuns cun
pulvra fina. L'avrigl ed il fanadur 2007 è plinavant la contaminaziun
cun ozon stada bler memia auta. En la vischinanza da la via ed en lieus
cun blers stgaudaments da laina cuntegna l'aria da respirar spezialmain
bler fulin. Che las substanzas nuschaivlas en l'aria han ina influenza
negativa per la sanadad da l'uman è incontestà. Il fulin che vegn
chaschunà da la combustiun da diesel u che deriva da stgaudaments cun
laina è spezialmain privlus en quest connex, perquai ch'i vegn supponì
ch'el chaschunia cancer.
Las datas da la mesiraziun da l'aria da l'onn 2007 èn resumadas en
la nova ediziun da l'infurmaziun davart l'ambient 1/08 e vegnan
cumplettadas cun infurmaziuns davart mesiras, tranter auter dals secturs
dal traffic e dals stgaudaments da laina. L'infurmaziun davart l'ambient
1/08 è publitgada en l'internet sut HYPERLINK
"http://www.umwelt-gr.ch" www.umwelt-gr.ch .
Per reducir vinavant l'emissiun da substanzas nuschaivlas ha
l'uffizi per la natira e l'ambient fatg l'onn 2007 ina controlla dal
progress da las mesiras existentas per mantegnair l'aria pura ed ha
preschentà ils champs d'acziun futurs en il plan da mesiras dal chantun
Grischun. Cun mesiras effizientas che s'orienteschan a la pratica èn
vegnidas creadas las premissas per observar las limitas d'immissiuns da
l'ordinaziun per mantegnair l'aria pura. Ultra dal basegn d'agir en il
traffic dovri mesiras per arder laina en stgaudaments pitschens ed en
stgaudaments d'industria sco er per arder ruments da laina al liber. Ma
er lavurs al liber, tranter auter sin plazzals, tar l'explotaziun da
material ed en l'agricultura, èn funtaunas considerablas per la
contaminaziun da l'aria. Mesiras èn er previsas tar la promoziun da
filters cunter particlas da diesel e tar la controlla da stgaudaments da
laina. Sche l'impestaziun cun pulvra fina e cun ozon è fitg gronda, èn
planisadas mesiras immediatas.
Gremi: uffizi per la natira e l'ambient
Funtauna: rg uffizi per la natira e l'ambient