Navigation

Inhaltsbereich

  • Erste Mitteilung
  • Neuen Beitrag einfügen
La biblioteca chantunala dal Grischun a Cuira vegn reaverta gievgia, ils 12 da zercladur 2008, a chaschun d'ina occurrenza publica cun visitas guidadas e cun in apero. Gia a partir da glindesdi, ils 9 da zercladur 2008, è la biblioteca puspè averta per las utilisadras e per ils utilisaders durant las uras usitadas. Cun la reavertura terminescha la biblioteca chantunala in grond project. Suenter lavurs da midada en il sectur public da la biblioteca, che han durà trais emnas, è il spectrum da servetschs vegnì extendì considerablamain.
Il team da la biblioteca chantunala envida cordialmain tut las persunas interessadas a la reavertura che ha lieu gievgia, ils 12 da zercladur. Quest di mussa la biblioteca, tge servetschs che vegnan purschids da nov e nua che las utilisadras e ch'ils utilisaders chattan quai ch'ellas e ch'els tschertgan. Da las 13.00 fin las 16.00, mintgamai a las uras cumplainas, han lieu curtas visitas guidadas tras la chasa. A las 12.30 ed a las 16.30 ha plinavant lieu in apero cun in pled dal bibliotecari chantunal davart ils motivs e davart ils connexs da las novaziuns, e quai en preschientscha dal team che stat a disposiziun per dumondas e per discurs. I n'è betg necessari da s'annunziar.

Gremi: biblioteca chantunala dal Grischun
Funtauna: rg biblioteca chantunala dal Grischun
Neuer Artikel