Cuntegn da la pagina

La midada da sistem tar la calculaziun dals tschains da locaziun vegn beneventada en general

  • Erste Mitteilung
  • Neuen Beitrag einfügen
La regenza grischuna è da princip d'accord cun ils plans da la confederaziun da midar il sistem tar la calculaziun dals tschains da locaziun. Quests plans prevesan da calcular ils tschains da locaziun sin basa da l'index empè sin basa dals custs, e quai cun distatgar ils tschains da locaziun da las tariffas dals tschains ipotecars. Il project da revisiun dal dretg d'obligaziuns che la confederaziun ha tramess en consultaziun vul cuntanscher ina meglra transparenza tar l'adattaziun dals tschains da locaziun. Da nov duain ils tschains da locaziun vegnir colliads cun l'index naziunal dals pretschs da consum.
Sco che la regenza scriva en sia resposta da consultaziun, vegnia fatg qua tras in pass impurtant en direcziun d'in model simplifitgà. Uschia dastgassan ils pretschs da locaziun sa sviluppar en l'avegnir en moda bler pli cuntinuada e bler main andetga. Tenor la regenza stoppia dentant vegnir resguardà che las cundiziuns generalas per fixar ils tschains inizials e per far adattaziuns posteriuras sajan gist uschè relevantas. Perquai saja spezialmain impurtant che tant las locatarias ed ils locataris sco er las locaturas ed ils locaturs hajan a disposiziun - il mument da l'entrada en vigur - in instrument da cumparegliaziun per controllar ils tschains da locaziun. Quest instrument stoppia esser transparent, s'orientar al martgà e valair en l'entir pajais.

Concludì ina nova contribuziun per metter ad alp chauras da latg
Il chantun Grischun sustegna finanzialmain la tratga da chauras da latg. La regenza grischuna ha concludì da pajar ils onns 2008 fin 2011 contribuziuns per metter ad alp chauras da latg. La contribuziun per chaura importa 50 francs l'onn 2008 e sa reducescha en moda degressiva a 35 francs l'onn 2011. Quest sustegn ha la finamira da segirar ils proxims onns l'effectiv da chauras da latg sco er la producziun da products prezius, sco p.ex. il chaschiel-chaura. Per commerzialisar ils products duai vegnir collavurà uschè stretgamain sco pussaivel cun l'uniun alpinavera.
La tratga da chauras ha ina lunga tradiziun en il Grischun. Differents facturs han chaschunà che l'effectiv da chauras è sa reducì permanentamain en il chantun, e quai da var 42'000 animals l'onn 1931 ad 8'900 animals l'onn 2001, quai ch'è stà l'effectiv il pli pitschen. Grazia a gronds sforzs da la federaziun da tratga da chauras ha l'effectiv puspè pudì vegnir augmentà l'onn passà a 10'500 animals. La contribuziun da sustegn dal chantun duai vegnir pajada independentamain dal fatg, sch'il latg vegn elavurà ad alp u giu la val. Il dretg da survegnir contribuziuns duain avair tut las alps che mettan ad alp diesch u dapli chauras da latg. Tar var 2'700 chauras da latg resulta uschia ina contribuziun totala da 459'000 francs per quests quatter onns.

Da vischnancas e da regiuns
- Sched: Il project "via da guaud Seala - Sploja" da l'associaziun da meglieraziun da Sched vegn approvà e sustegnì cun ina contribuziun da maximalmain 211'700 francs.
- Moesano: La revisiun parziala dals statuts dal consorzi da scola dal Moesano vegn approvada.
- Arosa: La revisiun parziala da la planisaziun locala da la vischnanca d'Arosa dals 24 da favrer 2008 vegn approvada.
- Maraton da velos d'Engiadina: L'organisatur dal 3. maraton da velos d'Engiadina survegn la permissiun d'utilisar dumengia, ils 6 da fanadur 2008, las rutas ch'èn previsas tenor il plan da traject en il chantun Grischun.

Contribuziuns chantunalas a differentas instituziuns
- Project "sonda senza fin": Il project "sonda senza fin" che ha lieu ils 15 da november 2008 a Cuira vegn sustegnì cun ina garanzia da deficit da maximalmain 40'000 francs.

Projects da vias
La regenza ha approvà totalmain 3'160'000 francs per construir e per sanar ils suandants trajects da vias:
- via naziunala A13: lavurs d'impressari e da cuvrida, Pian San Giacomo - Malabarba
- via da l'Alvra: lavurs da cuvrida, ospizi da l'Alvra - Punt Granda - Alp Nova
- via da la Mantogna dador: lavurs da cuvrida, Sarn - spartavias per Lescha
- via da Calanca: lavurs d'impressari, Ponte Arvigo
- via taliana: lavurs d'impressari, Forcola - Viganaia

Gremi: regenza
Funtauna: rg chanzlia chantunala dal Grischun
Neuer Artikel