Cuntegn da la pagina

Chauns - responsabladad da las vischnancas sco er da las possessuras e dals possessurs da chauns

  • Erste Mitteilung
  • Neuen Beitrag einfügen
Per ademplir las pretensiuns da la legislaziun federala e chantunala davart il tractament da chauns ha l'uffizi per la segirezza da victualias e per la sanadad d'animals stgaffì in agen post spezialisà per chauns. Quel duai er gidar a promover la collavuraziun cun las vischnancas e plinavant sustegnair las vischnancas en l'execuziun da lur incumbensas en il sectur dals chauns. Per promover la responsabladad da las possessuras e dals possessurs da chauns - che prestan ina contribuziun impurtanta cun educar lur chauns - èsi indispensabel ch'ellas e ch'els fetschian il brevet per possessuras e per possessurs da chauns.

Ils ultims onns han differents incidents cun chauns procurà d'ina vart per lingias grossas e da l'autra vart per gronda consternaziun e per malsegirezza tar la populaziun, uschia che la confederaziun ha stuì agir. Il matg 2006 èn vegnidas integradas novas disposiziuns en l'ordinaziun federala davart la protecziun dals animals. Tenor questas disposiziuns sto il chantun sclerir ils fatgs e prender mesiras, sch'i vegn annunzià in cas d'ina morsa da chaun u sch'in chaun mussa indizis d'in cumportament agressiv smesirà.
En la nova lescha chantunala davart ils fatgs veterinars ch'il cussegl grond ha deliberà l'onn 2007 e che entra previsiblamain en vigur il settember 2008 èn previsas mesiras effizientas per tals cas, sco p.ex. absolver in curs, pronunziar in'obligaziun da tegnair il chaun a la tschinta u d'al metter si in buccarè u schizunt da mazzar l'animal. En il rom dals scleriments ha il chantun ultra da quai il dretg da suttametter in chaun ad in test da cumportament.
Per pudair ademplir las novas incumbensas concernent ils chauns ha il chantun endrizzà in post spezialisà per chauns tar l'uffizi per la segirezza da victualias e per la sanadad d'animals (USVA). Quest post spezialisà ordinescha las disposiziuns necessarias concernent il scleriment dals fatgs e concernent las mesiras. Plinavant duai el esser cumpetent per ulteriuras dumondas en connex cun chauns. In pais spezial vegn mess sin la collavuraziun cun las vischnancas.

Incumbensas da las vischnancas
I vegn constatà che las vischnancas vegnan confruntadas pli e pli savens cun la tematica dals chauns, perquai ch'ellas èn normalmain l'emprima adressa da contact per burgaisas e per burgais preoccupads. Pervia da la cumplexitad da questa tematica s'impona ina collavuraziun lineara tranter las vischnancas ed il chantun, e quai cun reparter cleramain las incumbensas. Il chantun e las vischnancas han da princip las suandantas cumpetenzas:

chantun:
- sclerir ils fatgs ed ordinar las mesiras, sch'i vegnan annunziads accidents da morsas e chauns cun indizis d'in cumportament agressiv smesirà
- collavurar cun las partenarias e cun ils partenaris (vischnancas, polizia, veterinarias e veterinaris, uniuns)
- lavur da prevenziun (scolas, uniuns e.u.v.), per part ensemen cun las vischnancas
- tut las dumondas da la protecziun dals animals

vischnancas:
- il possess da chauns è suttamess a la controlla da las vischnancas
- da princip l'emprima adressa da contact en chaussas da chauns
- registrar ils chauns en ina banca da datas
- relaschar leschas da chauns en lur champ d'incumbensas (er per la prevenziun)
- ordinar emprimas mesiras tar chauns cun in cumportament frappant
- las vischnancas èn cumpetentas là, nua ch'il chantun n'è betg cumpetent

Il brevet da la SCS per possessuras e per possessurs da chauns
Ina contribuziun impurtanta ston er las possessuras ed ils possessurs da chauns prestar tras lur atgna responsabladad. Per motivs inexplitgabels vegn quella savens emblidada ed integrada bler memia pauc en la tematica. Igl è numnadamain in fatg che las possessuras e ch'ils possessurs da chauns han sulets la responsabladad e l'obligaziun d'avair quità en quai che reguarda il cumportament da lur chauns. Plinavant determineschan ellas ed els - tras lur scolaziun e tras lur tenuta - per gronda part il cumportament e la cumparsa dal chaun. En questa direcziun va la nova ordinaziun federala davart la protecziun dals animals che entra en vigur l'atun e che collia - sco novaziun - il possess da chauns cun tschertas cumprovas d'enconuschientschas da la materia. Er entaifer il chantun è la finamira cleramain quella da prender per mauns la tematica dals chauns sur l'atgna responsabladad da las possessuras e dals possessurs da chauns.
Pervia da quests svilups ha la societad cinologica svizra (SCS) elavurà in examen per possessuras e per possessurs da chauns: il brevet da la SCS per possessuras e per possessurs da chauns. Quest brevet cuntegna tut ils elements impurtants da l'educaziun fundamentala da chauns. L'examen è vegnì elavurà da spezialistas e da spezialists en dumondas dal cumportament sco er da cinologas e da cinologs cun gronda experientscha en la scolaziun fundamentala dals chauns sco er da lur possessuras e da lur possessurs.
Il brevet per possessuras e per possessurs da chauns sa differenziescha cleramain d'in examen per chauns da sport, perquai ch'el cuntegna exactamain quels puncts e quellas situaziuns dal mintgadi che resultan per las possessuras e per ils possessurs sco er per ils chauns sezs en la publicitad. I sa tracta qua dentant er d'ina clera pretensiun fundamentala che mintga possessura e che mintga possessur sco er che mintga chaun sto ademplir en noss temp. Quest brevet per possessuras e per possessurs da chauns è dentant er decisiv per il USVA. En spezial tar chauns che han problems en il contact cun auters chauns ubain tar possessuras e tar possessurs da chauns che han difficultads da far far per cumond il chaun, ordinescha il USVA da princip la frequentaziun da quest brevet. Uschia pon vegnir scuvrids e differenziads ils problems.

Tge cumpiglia il brevet da la SCS concretamain:
- protecziun per las possessuras e per ils possessurs da chauns
- las possessuras ed ils possessurs da chauns ston cumprovar ch'ellas e ch'els hajan lur chauns sut controlla
- las possessuras ed ils possessurs da chauns ston lavurar e sa fatschentar cun il chaun
- las possessuras ed ils possessurs da chauns exerciteschan situaziuns ch'ellas e ch'els dovran en il mintgadi
- tranter las possessuras resp. ils possessurs ed ils chauns sezs vegn promovì in cumportament da team
- las possessuras ed ils possessurs da chauns survegnan in certificat
- divertiment ed occupaziun per in chaun che n'è betg in chaun da sport u da lavur

Plinavant stoi vegnir remartgà tar il brevet:
- i sa tracta d'ina mesira da prevenziun
- il chantun e la vischnanca pon prevair il brevet sco mesira
- tras il brevet po il USVA far ina preselecziun per ordinar ulteriuras mesiras

Malgrà questa optimaziun da la qualitad na datti nagina garanzia ch'i na dettia betg puspè accidents cun chauns. Ina tala garanzia na vegni mai a dar. Cun far il brevet tegnan las possessuras ed ils possessurs da chauns dentant quint da las pretensiuns d'ozendi e surpiglian uschia indirectamain la responsabladad per il cumportament da lur chaun envers la publicitad.
Sche las possessuras e sch'ils possessurs da chauns dumognan il brevet cun success, pon ins spetgar ch'ellas e ch'els sajan en cas da prestar ina contribuziun impurtanta e positiva per la reputaziun actuala en connex cun la tematica dals chauns.

Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals
Neuer Artikel