Cuntegn da la pagina

Il Grischun surdat a la confederaziun ils documents da dumonda dals parcs natirals biosfera Val Müstair e parc Ela

  • Erste Mitteilung
  • Neuen Beitrag einfügen
La regenza grischuna sustegna ils parcs natirals biosfera Val Müstair e parc Ela dal Grischun central. Ella ha examinà ils documents da dumonda ed als ha surdà a la confederaziun. En quest connex dumonda ella l'uffizi federal d'ambient d'attribuir il label da parc al parc natiral biosfera Val Müstair. Ultra da quai dumonda il chantun la confederaziun da conceder in agid finanzial global per la gestiun e per la garanzia da qualitad dal parc. Er per l'installaziun dal parc Ela dumonda la regenza l'uffizi federal d'ambient da conceder in agid finanzial global. Tenor l'ordinaziun federala davart ils parcs d'impurtanza naziunala èsi l'incumbensa dal chantun d'examinar, sch'ils documents da dumonda èn cumplets e corrects.
Vi dals custs da gestiun dal parc natiral regiunal biosfera Val Müstair sa participescha il chantun cun 60 pertschient da la contribuziun federala durant ils onns 2008 fin 2011, dentant cun maximalmain 300'000 francs per onn. Er 60 pertschient da la contribuziun federala, dentant maximalmain 250'000 francs per onn paja il chantun vi dals custs per installar il parc natiral regiunal Ela. Resalvadas restan en tuts dus cas la concessiun dals credits necessaris tras il cussegl grond sco er la garanzia dals agids finanzials da la confederaziun.
La regenza è da l'opiniun che las premissas sajan ademplidas per conceder il label da parc e per dar ils agids finanzials al project "parc natiral regiunal biosfera Val Müstair". Er il parc Ela ademplescha tenor la regenza las premissas per survegnir ils agids finanzials da la confederaziun. Tant la Val Müstair sco er il parc Ela hajan valurs natiralas fitg grondas sco er ina buna qualitad da la cuntrada.

La nova lescha davart las finanzas e la surveglianza da las finanzas entra en vigur retroactivamain il 1. da schaner 2008
La lescha davart las finanzas e davart la surveglianza da las finanzas dal chantun Grischun vegn messa en vigur retroactivamain per il 1. da schaner 2008. Quai ha concludì la regenza grischuna. Il medem mument ha ella adattà las prescripziuns sin il stgalim da l'ordinaziun ed approvà la nova ordinaziun davart las finanzas chantunalas. Il cussegl grond aveva deliberà la revisiun totala da la lescha davart las finanzas dal chantun Grischun ils 30 d'avust 2007. Il termin da referendum è scadì ils 12 da december 2007 senza ch'i saja vegnì fatg in tal. Cun questa lescha vegn concretisada la posiziun da la controlla da finanzas sin il stgalim da la lescha e rinforzada l'independenza da la controlla da finanzas. Ultra da quai stgaffescha la lescha la basa per surdar il secretariat da la cumissiun da gestiun - che sa chatta actualmain tar la controlla da finanzas - al secretariat dal cussegl grond .

Il nov sistem d'infurmaziun per il servetsch veterinar public vegn beneventà
La regenza grischuna approvescha l'ordinaziun davart il sistem d'infurmaziun per il servetsch veterinar public che la confederaziun ha tramess en consultaziun. Per pudair ademplir las incumbensas executivas cumplexas dal servetsch veterinar public en il futur en moda pli effizienta ha l'uffizi federal veterinar sviluppà - en collavuraziun cun ils uffizis chantunals - in nov sistem per la gestiun e per l'administraziun da las datas. L'ulteriur svilup d'in sistem cuminaivel, cunvegnent ed unitar per ils secturs "protecziun dals animals", "epidemias d'animals" ed "igiena da victualias" vegn beneventà da la regenza. Ella crititgescha dentant che la finanziaziun d'ulteriurs svilups dal sistem n'è betg reglada en moda suffizienta.

Da vischnancas e da regiuns
Farera: La constituziun da la vischnanca da Farera dals 14 da december 2007 vegn approvada. Er la lescha da taglia da la vischnanca dals 14 da december 2007 vegn approvada.
Stussavgia: La constituziun da la vischnanca da Stussavgia dals 22 d'october 2007 vegn approvada.
Arvigo: La revisiun parziala da la constituziun communala da la vischnanca d'Arvigo, concludida da la radunanza communala dals 16 da november 2007, vegn approvada.
La Punt Chamues-ch: La lescha davart las taxas da giasts e da turissem da la vischnanca da La Punt Chamues-ch dals 26 d'october 2007 vegn approvada.
Veulden: La revisiun totala da la planisaziun locala da la vischnanca da Veulden dals 8 da zercladur 2007 vegn approvada.
Seglias: La revisiun parziala da la planisaziun locala da la vischnanca da Seglias dals 12 d'avrigl 2006 ch'è vegnida concludida en reguard a l'engrondiment da la chava da crappa Campi è vegnida approvada cun in pèr cundiziuns.

Contribuziuns chantunalas a differentas instituziuns
Federaziun grischuna da patinadi: La federaziun grischuna da patinadi survegn ina contribuziun dal fond da sport da maximalmain 24'000 francs per acquistar in sistem internaziunal da giuditgar da la ISU (international skating union).

Projects da vias
La regenza ha approvà totalmain 65'000 francs per construir e per sanar il suandant traject da via:
- via da Val S. Pieder: lavurs d'impressari a S. Martin
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun
Neuer Artikel