Suenter la fin da las lavurs da sanaziun al tunnel dal San Bernardin
e sin il traject tranter la colliaziun da Pian San Giacomo e la
colliaziun provisorica da Malabarba vegn abolì a partir da glindesdi,
ils 7 da fanadur 2008, l'urden da traffic che vala dapi bunamain sis
onns per il traffic da camiuns sin la via naziunala A13 tranter Lostallo
e Nufenen. Il sistem da controlla vertent vegn dentant mo dismess cun
mesiras accumpagnantas che duain garantir sche pussaivel la segirezza da
tut las participantas e da tut ils participants dal traffic.
La renovaziun cumplessiva dal tunnel dal San Bernardin ha pudì
vegnir terminada en il fratemp. En emprima lingia èn vegnids modernisads
ils indrizs da segirezza pervia dals incendis ch'igl ha dà ils onns
passads en tunnels da la Svizra e da l'exteriur. Uschia ha il tunnel
survegnì supplementarmain ina galaria da segirezza che passa sut ils
vials ed ina ventilaziun cunter incendis. Questas duas meglieraziuns
procuran per in standard da segirezza che correspunda a quel da la A2 en
il tunnel dal Gottard. Il motiv principal per il scumond da laschar
cruschar il traffic pesant en il tunnel dal San Bernardin e per la
prescripziun da dosar il traffic sin la ruta dal San Bernardin scroda
pia. La confederaziun ed il chantun èn consequentamain sa decidids
d'abolir l'uschenumnà sistem da traffic en direcziun unica per ils 7 da
fanadur da quest onn. I n'è dentant er betg giustifitgà da mantegnair il
sistem vertent, perquai ch'el è cumbinà cun numerus dischavantatgs e cun
numerusas restricziuns. Dischavantagiusas èn sa mussadas particularmain
las restricziuns per il traffic regiunal da provediment, la circulaziun
dal traffic disturbada, il diever da la via naziunala cuntrari a
l'intent tras il traffic en colonna ed il spustament dal traffic sin la
via chantunala, ils indrizs provisorics insuffizients en las zonas da
spetga per las camiunistas e per ils camiunists sco er la concentraziun
da las grevezzas per l'aria e per la canera en il sectur da las zonas
menziunadas. La finala na sa lascha l'urden da traffic vertent dentant
er betg pli sa giustifitgar sut l'aspect da las frequenzas dal traffic
pesant actualas e previsas. Las infurmaziuns da basa existentas dals
ultims onns (expertisa per la A13 e cifras davart il traffic) permettan
da concluder ch'i na saja betg da far quint a media vista cun in augment
significativ dal traffic pesant sin la A13.
Mesiras accumpagnantas
Suenter l'aboliziun dal sistem da dosar vertent duain tuttina vegnir
mantegnidas las suandantas prescripziuns da traffic che gidan ad
augmentar la segirezza sin la ruta dal San Bernardin:
- prescripziun da tegnair ina distanza da 150 meters tranter
ils camiuns
- scumond da surpassar per camiuns
Ultra da quai ston vegnir creadas las premissas per pudair endrizzar
a curta vista puspè in sistem da regulaziun, per il cas ch'il traffic da
guntgida sur il San Bernardin surpassass la capacitad da questa ruta. La
regenza grischuna dumonda la finala la confederaziun d'etablir in center
da controlla per il traffic pesant al sid dal tunnel dal San Bernardin.
Gremi: departament da construcziun, traffic e selvicultura
Funtauna: rg departament da construcziun, traffic e selvicultura