En connex cun l'ulteriura avertura planisada dal martgà da posta spetga la regenza grischuna dal cussegl federal e da la posta che la qualitad dal provediment da basa vegnia mantegnida. In pegiurament dal grad da provediment actual na fiss betg acceptabel. Quai menziunescha la regenza en sia resposta da consultaziun davart la revisiun totala da la lescha da posta che vegn proponida da la confederaziun.
Per la regenza è in provediment da basa equivalent che funcziunescha ina premissa indispensabla per il svilup futur da las regiuns da muntogna e da las regiuns periferas. Ultra da quai vai per mantegnair plazzas da lavur en questas regiuns. Da princip è la regenza d'accord cun il concept dal cussegl federal. Ella po dentant approvar la revisiun totala da la legislaziun da posta mo, sch'i vegnan garantids in provediment da basa ch'è qualitativamain irreproschabel e sia finanziaziun. Uschia pretenda la regenza che l'ulteriura avertura dal martgà da posta vegnia fatga en plirs stgalims. Il proxim stgalim duai vegnir realisà mo, sche las consequenzas da l'ultim stgalim èn enconuschentas e sche la Svizra è persvasa dal niz total dal proxim stgalim da l'avertura dal martgà. Or da quest puntg da vista è l'urari previs plitgunsch in zic memia curt. Plinavant s'exprima la regenza per tariffas ch'èn en tut la Svizra independentas da la distanza, per stgaffir las medemas cundiziuns per tut las parts da la populaziun e per tut las regiuns da la Svizra.
Cun la revisiun totala da la lescha da posta planisescha la confederaziun d'abolir il monopol da brevs e d'avrir uschia il martgà cumplettamain per l'onn 2012. Per cuntanscher quai duai la posta vegnir midada d'in institut da dretg public en ina societad anonima da dretg spezial.

La consultaziun tar la lescha davart l'execuziun giudiziala è averta
En il chantun Grischun duai l'execuziun giudiziala vegnir reglada da nov sin il stgalim da la lescha ed adattada a las novas disposiziuns federalas. La regenza grischuna ha avert la consultaziun tar la nova lescha davart l'execuziun giudiziala en il chantun Grischun.
Sin plaun federal entran en vigur l'onn 2010 la nova procedura penala svizra e la procedura penala svizra per giuvenils. Fin quella giada ston ils chantuns far las adattaziuns necessarias en lur dretg chantunal. Per il sectur da l'execuziun da chastis e da mesiras dovri perquai in agen relasch sin il stgalim da la lescha.
Puncts centrals da la nova lescha davart l'execuziun giudiziala èn las regulaziuns davart la segirezza e davart l'urden, davart il sforz direct e davart ils fatgs disciplinars en las instituziuns d'execuziun. Medemamain vegnan adattadas las regulaziuns davart l'execuziun da sancziuns dal dretg penal per giuvenils. Plinavant fixescha il dretg nov las premissas per pudair communitgar datas da persunas che sa refereschan a l'execuziun giudiziala. Da nov pon las autoritads infurmar sin dumonda las victimas da delicts grevs davart il cumenzament dal chasti u da la mesira d'ina persuna sentenziada, davart ses congedi, davart ses transferiment e davart sia relaschada.
Ultra da quai vegn la basa legala dal post da cussegliaziun per persunas violentas che figurava fin ussa sin il stgalim da l'ordinaziun, dauzada sin il stgalim da la lescha. La finamira dal post da cussegliaziun che ha cumenzà cun sia lavur il settember 2007 è quella da mussar vias or da la spirala da violenza, e quai tras cussegliaziuns voluntaras. Plinavant vegni fixà en la lescha che la polizia annunzia las persunas violentas al post da cussegliaziun, e quai cunzunt tar intervenziuns en il sectur da la violenza a chasa. In'ulteriura novaziun essenziala è previsa en connex cun la finanziaziun dals custs per l'execuziun da mesiras. Da nov renunzia il chantun da metter a quint a las vischnancas ils custs per l'execuziun da mesiras penalas staziunaras en ils stabiliments d'execuziun. Il fatg ch'il chantun surpiglia quests custs correspunda al detretschament da las incumbensas ch'è previs en il rom da la gulivaziun da finanzas grischuna (NGF).
Ils documents da consultaziun èn avant maun sin la pagina d'internet dal departament da giustia, segirezza e sanadad ( www.djsg.gr.ch ). La consultaziun dura fin ils 15 da settember 2008.

Elegì ils commembers dal cussegl consultativ da la viafier retica
La regenza grischuna ha nominà ils commembers dal cussegl consultativ da la viafier retica (VR) per la perioda d'uffizi dal 1. da fanadur 2008 fin ils 30 da zercladur 2012. Elegids èn Marco Berger (Razén), Ludwig Caluori (Casti), Fabrizio Keller (Grono), Manfred Kürschner (Cuira), Casper Nicca (Tusaun), Jon Domenic Parolini (Scuol), Rodolfo Plozza (Brusio), Ernst Sax (Glion) e Leo Koch (Tavau Plaz). Ils maximalmain 20 commembers e commembras dal cussegl consultativ vegnan elegids mintgamai per la mesadad dal cussegl grond e da la regenza. En connex cun questas elecziuns èsi vegnì resguardà spezialmain che tut las regiuns d'urari sajan represchentadas en moda adequata en questa cumissiun. Las incumbensas dal cussegl consultativ èn quellas da retschaiver las orientaziuns davart il svilup architectonic, tecnic e commerzial da l'interpresa e da scriver recumandaziuns per maun dal cussegl administrativ sco er da preschentar giavischs regiunals.

Da vischnancas e da regiuns
- St. Antönien: Il project da la vischnanca da St. Antönien per engrondir il provediment d'aua public vegn approvà e sustegnì cun ina contribuziun dad 1'459'449 francs.
- Castaneda: La revisiun parziala da la planisaziun locala da la vischnanca da Castaneda dals 22 da mars 2007 vegn approvada.
- Val S. Pieder: La revisiun parziala da la planisaziun locala che concerna il deposit da material "Rota Bärg" e la zona d'explotaziun "Jossagada", ch'è vegnida concludida ils 24 da favrer 2008 da la vischnanca da Val S. Pieder, vegn approvada.
- Zuoz: La revisiun parziala da la planisaziun locala "Chöntschet" da la vischnanca da Zuoz dals 12 da december 2007 vegn approvada.
- Surses: La revisiun parziala da la lescha davart las taxas da cura e davart las contribuziuns per promover il turissem da l'uniun d'interess turistic da las vischnancas dal Surses dals 16 da schaner 2008 vegn approvada.
- Maraton d'inline da l'Engiadina: A l'organisatur dal maraton d'inline d'Engiadina vegn concedida la permissiun per pudair utilisar il percurs ch'è previs per il maraton d'inline d'Engiadina la sonda, ils 28 da zercladur 2008.

Contribuziuns chantunalas a differentas instituziuns
- SPORTKIDS BCG: Il program da trenament dals SPORTKIDS BCG per l'onn 2008/2009 vegn sustegnì cun ina contribuziun da maximalmain 204'000 francs or dal fond da sport.
- Spleia/Valragn turissem: Spleia/Valragn turissem survegn ina contribuziun da maximalmain 18'800 francs or dal fond da sport per la construcziun nova planisada da la punt da passlung a Spleia.
- Societad istorica Val Poschiavo: La societad istorica Val Poschiavo e la biblioteca "la Sorgente" a Puschlav survegnan ina contribuziun maximala dad 11'700 francs per inventarisar e per documentar la collecziun da fotografias da Luigi Gisep.

Projects da vias
La regenza ha approvà totalmain 413'000 francs per construir e per sanar il suandant traject da via:
- via d'Engiadina: lavurs da cuvrida en il vitg da Ramosch.

Gremi: regenza
Funtauna: rg chanzlia chantunala dal Grischun