Il Grischun surpiglia per in onn il presidi da la ARGE ALP
Il presidi da la cuminanza da lavur da las regiuns alpinas (ARGE ALP) va da la Baviera al chantun Grischun. La conferenza da las scheffas e dals schefs da las regenzas da la ARGE ALP ha lieu quest onn venderdi, ils 20 da zercladur 2008, a Prien sper il Chiemsee. Il chantun Grischun vegn a trair a niz ses onn da presidi per metter accents en la politica da las Alps. Latiers tutgan in simposi davart il futur da la ARGE ALP en il cussegl grond, la concentraziun da las resursas en il turissem alpin e l'avertura cun servetschs da telecommunicaziun. En il sectur cultural duai vegnir publitgada ina concurrenza da musica cun in premi per interpretas e per interprets giuvens.
A la 39avla conferenza annuala da las scheffas e dals schefs da las regenzas vegnan spetgads represchentantas e represchentants da las suandantas diesch regiuns (stadis, provinzas e chantuns): Baviera, Grischun, Lumbardia, Salzburg, Son Gagl, Tessin, Tirol, Tirol dal sid, Trentino e Vorarlberg. La ARGE ALP è vegnida fundada l'onn 1972 e s'engascha - tras la collavuraziun transcunfinala - per il tractament da problems e d'interess communabels cunzunt en il sectur ecologic, cultural, social ed economic. Plinavant vul ella promover la chapientscha vicendaivla dals pievels en il territori alpin e rinforzar la conscienza per la responsabladad communabla per il spazi da viver alpin.

La politica e la cultura domineschan
Suenter la conferenza da las scheffas e dals schefs da las regenzas da la ARGE ALP en Baviera surpiglia - confurm al turnus - il chantun Grischun per in onn il presidi da la ARGE ALP. L'ultima giada ha il Grischun presidià ils onns 1993 e 1994 la ARGE ALP. A la scuntrada da las scheffas e dals schefs da las regenzas preschenta il cusseglier guvernativ Martin Schmid ils puncts caracteristics da l'onn presidial dal Grischun. In punct central è il simposi davart il tema "La via futura da la ARGE ALP - sfidas e perspectivas". Quest simposi ha lieu ils 10 da december 2008 en il cussegl grond a Cuira durant la sessiun dal parlament. Al simposi vegnan envidads las scheffas ed ils schefs da las regenzas da la ARGE ALP sco er ulteriuras persunalitads da renum da la politica da las Alps. Qua tras vul il Grischun prestar ina contribuziun politica a la via futura da la ARGE ALP.
Sco ulteriurs puncts centrals politics vul il Grischun tematisar il turissem alpin sco er la societad d'infurmaziun e la politica d'infrastructura. Quests secturs èn decisivs per ina politica alpina activa. La concentraziun da las resursas en il turissem alpin sco er la promoziun dal territori alpin sco destinaziun da vacanzas han ina impurtanza economica enorma. Impurtant per la populaziun en il territori alpin e spezialmain per la cumpetitivitad da las interpresas è plinavant il provediment da basa cun servetschs da telecommunicaziun d'auta qualitad. Latiers èn planisadas duas resoluziuns che duain vegnir tractadas a chaschun da la proxima conferenza da las scheffas e dals schefs da las regenzas che ha lieu il zercladur 2009 a Flem.
In accent frestg vul il Grischun metter durant ses onn presidial tras la publicaziun dal premi da la ARGE ALP 2009. Questa concurrenza, che surdat in premi da musica, duai dar ina vusch a la giuventetgna. I duai vegnir premiada ina contribuziun musicala che sa fatschenta en moda creativa cun il tema da las Alps. A medem temp duai il premi da la ARGE ALP gidar a promover musicistas giuvnas e musicists giuvens en il territori alpin ed als dar la pussaivladad da sa preschentar en tut il territori da la ARGE ALP.

Blers temas a la conferenza a Prien
La scuntrada da las scheffas e dals schefs da las regenzas da la ARGE ALP a Prien sper il Chiemsee stat sut il motto "ARGE ALP - ina ferma pitga per l'Europa". Cun questa chaschun discussiunan las represchentantas ed ils represchentants da las regenzas differents temas. Tranter auter preschenta la Baviera in rapport davart la midada dal clima e davart la biodiversitad en il territori alpin. In auter tema è l'avegnir da l'agricultura e dal svilup rural en il territori alpin. En quest connex èsi planisà da deliberar ina resoluziun che accentuescha la rolla centrala da l'agricultura e da la selvicultura per il mantegniment da la cuntrada cultivada en las Alps.
Ultra da quai barattan las scheffas ed ils schefs da las regenzas lur experientschas davart la dumonda, co che potenzials nunutilisads en il territori rural pon vegnir tratgs a niz meglier. Latiers preschenta il chantun Grischun in studi che vegn a la conclusiun ch'i na dettia nagins territoris senza potenzials; la dumonda saja dentant, sch'ils potenzials ch'èn avant maun vegnan identifitgads sco tals e sch'els pon vegnir tratgs a niz.
In tema impurtant èn er ils svilups actuals tar il traffic che traversa las Alps. Il matg ha la Baviera fatg latiers ina conferenza internaziunala cun il num "Traffic en las Alps - preferenza per la viafier". En quest connex èsi sa mussà ch'i resta ina incumbensa centrala per las commembras e per ils commembers da la ARGE ALP da dar dumogn a l'augment dal traffic. Cun las mesiras per engrondir il tunnel da basa dal Brenner duai perquai vegnir cuntinuà cun tut las resursas pussaivlas. Las scheffas ed ils schefs da las regenzas discuteschan dentant er il stadi da las lavurs da construcziun da la nova lingia da viafier tras las Alps (NVTA) e la colliaziun da l'Italia cun quest project da viafier.

Otg projects communabels da la ARGE ALP
Per mauns da la conferenza da las scheffas e dals schefs da las regenzas ha la cumissiun da direcziun da la ARGE ALP inoltrà tut en tut otg projects. Il chantun Grischun tgira ils gieus da la ARGE ALP che han grond success. A las occurrenzas da sport da l'onn da sport 2006/2007 èn sa participads var 1'400 giuvenils. L'avust ha lieu en il Tirol dal sid l'emprima occurrenza da sport per persunas cun impediments da la ARGE ALP. Er cun il project cumprovà da barat d'emprendistas e d'emprendists "XChange" vegni cuntinuà.
Il Grischun ha inoltrà il nov project "Animals da rapina gronds en las Alps". Quest project vul sa fatschentar cun l'urs, cun il luf u cun il luf-tscherver - animals da rapina gronds ch'eran ina giada da chasa en las regiuns alpinas. En quest connex duain vegnir tematisadas las midadas ch'igl ha dà tar las premissas dals spazis da viver ed ils potenzials da conflict ch'èn colliads cun quai. Quest project vul cuntanscher ina collavuraziun transcunfinala ed in barat d'experientschas sin plaun professiunal. A la conferenza da las scheffas e dals schefs da las regenzas duain la finala vegnir tractads er ulteriurs projects, cunzunt il "atlas dialectologic pledant", al qual er l'uniun grischuna da las Gualsras e dals Gualsers cooperescha.

Ulteriuras infurmaziuns:
Ina survista dals projects ils pli impurtants da la ARGE ALP po vegnir chargiada giu qua.
www.argealp.org

Persuna che dat infurmaziuns:
cusseglier guvernativ Martin Schmid, schef dal departament da finanzas e vischnancas, tel. 081 257 32 01

Gremi: regenza
Funtauna: rg chanzlia chantunala dal Grischun