En cumbinaziun cun la tgira chantunala da monuments e cun la societad per la perscrutaziun da la cultura grischuna ha la societad d'istorgia d'art en Svizra edì il nov «Guid da monuments d'art tras il Grischun». Il cudesch ch'è gist cumparì preschenta sin 392 paginas fatgs e chaussas interessantas davart ils stgazis d'art dal Grischun. Sco ovra da standard per il turissem cultural sa drizza quest manual cumpact tant ad in vast public sco er a spezialistas ed a spezialists.

Il nov «Guid da monuments d'art tras il Grischun» cuntegna tut ils fatgs e tut las chaussas interessantas davart ils stgazis culturals ed architectonics dal chantun Grischun. Edì vegn quest tom - che cuntegna bleras illustraziuns e ch'è concepì en moda bain survesaivla - da la societad d'istorgia d'art en Svizra en cumbinaziun cun la tgira chantunala da monuments e cun la societad per la perscrutaziun da la cultura grischuna.

Manual cumpact per in vast public
Las descripziuns pregnantas, las numerusas illustraziuns e chartas sco er divers plans locals da quest manual cumpact mainan tras tut las epocas e tras tut las regiuns dal Grischun, da chats archeologics sur chastels e baselgias dal temp medieval fin al svilup actual da l'architectura. Maletgs da colur da format grond ed ina retscha da texts tematics davart aspects spezials da l'istorgia d'art e da l'istorgia culturala cumpletteschan las singulas represchentaziuns. Il «Guid da monuments d'art tras il Grischun» maina da las restanzas da las colonnas romanas sin il pass dal Güglia fin a la terma da Val S. Pieder che Peter Zumthor ha creà tras las vals e tras las cuntradas d'art dal Grischun. Ils essais tematics rendan per exempel spezialmain attent a l'art caroling, al maister da Vuorz, a la chasa engiadinaisa ed a las construcziuns da la viafier retica.
Il guid d'art sa drizza ad in vast public sco er a spezialistas ed a spezialists ed è concepì - tant graficamain sco er didacticamain - en moda persvadenta. La retscha dals guids pratics tras ils chantuns vegn cuntinuada er per auters chantuns. Gist cumparì è er il «Guid da monuments d'art tras il chantun Turitg».

Indicaziuns davart il cudesch:
Guid da monuments d'art tras il Grischun, edì da la societad d'istorgia d'art en Svizra en cumbinaziun cun la tgira chantunala da monuments e cun la societad per la perscrutaziun da la cultura grischuna, chasa editura Scheidegger & Spiess, Turitg, lià, 392 paginas, 52 illustraziuns da colur e 314 en alv e nair, 25 plans dissegnads es 8 chartas, 12,8 x 21 cm, 978-3-85881-216-2, fr. 49.90 / Euro 29.90.

Persuna che dat infurmaziuns:
Hans Rutishauser, tgira chantunala da monuments, tel. 081 257 27 91

Gremi: tgira da monuments dal Grischun
Funtauna: rg tgira chantunala da monuments