Ils 14 ed ils 15 d'avust 2008, a chaschun dal project da pilot "Meet in Davos", survegnan gimnasiastas e gimnasiasts tranter 15 e 17 onns invistas extraordinarias da professiuns da la scienza natirala, da la tgira e da l'assistenza.

Co vegn mesirada la forza da la radiaziun dal sulegl? Co vegni mussà als uffants da leger e da scriver? Co guareschan ruttadiras da l'ossa? Tge fa propi il manader d'ina canorta d'uffants pitschens? E co daventan ins fisicra, magister, tgirunz d'uffants u biologa cellulara? Durant dus dis mussa differenta glieud da professiun sia plazza da lavur a gimnasiastas mirvegliusas ed a gimnasiasts mirveglius e discutescha cun ellas e cun els davart la tscherna da professiun e davart la planisaziun da la vita.
Il project da pilot "Meet in Davos" è ina collavuraziun dal post da stab per l'egualitad da las schanzas, da la citad da scienza Tavau e da l'institut federal per la perscrutaziun da naiv e lavinas a Tavau. Il project ha la finamira d'inspirar umans giuvens per ina carriera nunusitada e d'als mussar, tge plazzas da lavur attractivas ch'i dat en il chantun Grischun. Sco punct spezial dal program datti in inscunter cun studentas e cun students da la "academia averta da Tavau 2008". La participaziun al "Meet in Davos" è gratuita. Annunzia ed ulteriuras infurmaziuns sin la pagina d'internet www.meet-in-davos.ch.

Gremi: post da stab per l'egualitad da las schanzas
Funtauna: rg post da stab per l'egualitad da las schanzas