Cuntegn da la pagina

La regenza suttametta trais novas fusiuns da vischnancas al cussegl grond

  • Erste Mitteilung
  • Neuen Beitrag einfügen
La regenza grischuna ha approvà las trais cunvegnas davart la fusiun da las vischnancas da Veulden, da Sched, da Tràn e da Tumegl a la nova vischnanca da Tumegl, davart la fusiun da las vischnancas da Tavau e da Wiesen sco er davart la fusiun a la nova vischnanca da vallada da Val Müstair. La regenza ha deliberà las missivas correspundentas e propona al cussegl grond da metter en vigur las fusiuns per il 1. da schaner 2009. Il cussegl grond vegn a tractar las fatschentas en la sessiun d'avust. Sch'il cussegl grond approvescha questas trais fusiuns da vischnancas, sa reducescha il dumber da las vischnancas grischunas da 203 a 194.
Tras la fusiun da las vischnancas da la Val Müstair nascha l'emprima vischnanca da vallada en il chantun Grischun. Per la fusiun èn sa decididas las vischnancas da Fuldera, da Lü, da Müstair, da Sta. Maria V.M., da Tschierv e da Valchava.
Tenor l'artitgel 64 da la constituziun dal chantun Grischun promova il chantun la fusiun da vischnancas per garantir che lur incumbensas vegnian ademplidas en moda cunvegnenta ed economica. Ultra da quai po il chantun pajar contribuziuns per promover fusiuns. La nova vischnanca da Tumegl survegn dal chantun ina contribuziun da promoziun en l'autezza da totalmain 2'800'000 francs. Per la vischnanca da Tavau importa la contribuziun da promoziun 3'300'000 francs. Per la nova vischnanca da Val Müstair è previsa ina contribuziun dad 8'600'000 francs.

Gremi: regenza
Funtauna: rg chanzlia chantunala dal Grischun
Neuer Artikel