Navigation

Inhaltsbereich

  • Erste Mitteilung
  • Neuen Beitrag einfügen
Per proteger las nunfimadras ed ils nunfimaders cunter il fimar passiv vegni scumandà en il Grischun a partir dal 1. da mars 2008 da fimar en localitads serradas ch'èn accessiblas al public. En il senn d'ina excepziun èsi pussaivel da fimar mo pli en localitads separadas per fimadras e per fimaders. Ultra da quai vegni scumandà en general da fimar a l'intern ed a l'extern da scolas e d'implants da sport da scola sco er da lieus da scuntrada e d'instituziuns da tgira per uffants e per giuvenils. La regenza grischuna ha mess en vigur la revisiun parziala correspundenta da la lescha davart ils fatgs da sanadad dal chantun Grischun, e quai per il 1. da mars 2008. A medem temp ha ella adattà l'ordinaziun tar la lescha da sanadad.
Il cussegl grond aveva approvà la revisiun parziala da la lescha da sanadad ils 19 d'avrigl 2007. Cunter quella era alura vegnì fatg in referendum. A chaschun da la votaziun dals 25 da november 2007 ha il pievel approvà cleramain la revisiun parziala da la lescha da sanadad, e quai cun 35'035 cunter 11'766 vuschs. Per l'execuziun na dovri - tenor la regenza - betg in temp transitoric.
La revisiun parziala da la lescha da sanadad premetta en plirs puncts prescripziuns executivas sin il stgalim da l'ordinaziun. Concretamain pertutga quai la concepziun da las localitads per fimadras e per fimaders. Tenor l'ordinaziun dastga consequentamain la surfatscha da las localitads per fimadras e per fimaders importar maximalmain in terz da la surfatscha da las localitads serradas ch'èn accessiblas al public. Tar manaschis da restauraziun e d'hotellaria è decisiva en quest connex la surfatscha ch'è destinada a la consumaziun da spaisas u da bavrondas. Ils locals da fimar ston ultra da quai esser marcads sco tals. Els ston plinavant esser separads uschia, che las nunfimadras e ch'ils nunfimaders na vegnan betg disturbads tras il fim. Igl è chaussa da las vischnancas da controllar che questas prescripziuns vegnian observadas.
Ultra da quai vegnan reglads en l'ordinaziun ils detagls davart la controlla da la cultivaziun da chonv, davart la consegna da medicaments tras medias e tras medis che n'han betg ina permissiun da manar in'apoteca sco er davart la concepziun dal servetsch d'urgenza da las apotecas.

La furmaziun professiunala superiura dal sectur "economia" ha lieu en il futur al IFSP sco scolaziun cun dretg da survegnir contribuziuns
En il sectur da la furmaziun professiunala superiura ha la regenza grischuna repartì da nov las incumbensas tranter la scola auta da tecnica ed economia (SATE) e l'institut per furmaziun supplementara professiunala (IFSP). La furmaziun professiunala superiura dal sectur "economia" ha lieu - a partir da l'onn da studi 2009/2010 - al IFSP sco scolaziun cun dretg da survegnir contribuziuns. Ils studis da la furmaziun professiunala superiura che han cumenzà l'ultima giada a la SATE l'onn da studi 2008/2009 pon vegnir terminads en moda regulara fin il pli tard la fin da l'onn da studi 2010/2011; il chantun paja en quest connex las contribuziuns ch'èn anc necessarias. Quai ha decidì la regenza en reguard a l'elavuraziun dals contracts da basa 2009 - 2011 per la SATE e per il IFSP. Ils studis che la SATE porscha sin il stgalim da la scola auta professiunala n'èn betg pertutgads da questa decisiun.
La regenza è cumpetenta per renconuscher las scolas professiunalas superiuras u instituziuns che porschan ina furmaziun supplementara professiunala sco instituziuns cun dretg da survegnir contribuziuns. Tenor l'opiniun da la regenza n'èsi betg economic da porscher la medema scolaziun en questas duas scolas, da las qualas il deficit vegn finanzià cun daners publics. Cun surdar la furmaziun professiunala superiura dal sectur "economia" al IFSP pon questas duas instituziuns da scolaziun sa profilar anc pli fitg en lur domenas centralas. Ultra da quai poi uschia vegnir evità ch'i sa fetschia valair ina concurrenza intrachantunala per studentas e per students.

Il "program naziunal alcohol 2008 - 2012" da la confederaziun vegn beneventà
La regenza grischuna beneventa il "program naziunal alcohol 2008 - 2012" da l'uffizi federal da sanadad publica. Quest program ha la finamira da reducir il consum problematic d'alcohol e cunzunt il baiver sturn tar giuvenils e vul sminuir uschia malsognas consecutivas, accidents ed acts da violenza. En sia audiziun constatescha la regenza che l'abus d'alcohol è in dals problems social-medicinals ils pli gronds. Perquai beneventa ella las finamiras ch'èn vegnidas formuladas en il program. La regenza remartga dentant che la difficultad dal catalog da mesiras fitg cumplessiv saja quella da reagir sin problems cun cleras mesiras, senza dentant far novas intervenziuns en la libertad persunala da la singula persuna e da l'economia dal martgà liber.

La regenza sustegna la lescha federala planisada davart l'agid a las scolas autas e davart la coordinaziun en il sectur da las scolas autas svizras
La regenza grischuna beneventa la nova lescha federala davart l'agid a las scolas autas e davart la coordinaziun en il sectur da las scolas autas svizras. Ultra da las directivas per garantir la qualitad ed ultra da la repartiziun da las incumbensas tranter ils differents tips da scolas autas e tranter las differentas scolas autas stoppian dentant vegnir resguardads adequatamain er aspects da la politica regiunala e da la politica da linguas. Quai menziunescha la regenza en sia resposta da consultaziun. La regenza va d'accord cun il sistem d'accreditaziun che vegn proponì. Quest instrument pussibiliteschia da cumparegliar e d'ademplir las pretensiuns da qualitad en l'entira Svizra. Da princip sustegna la regenza er l'instrument d'ina planisaziun strategica naziunala. I stoppia dentant vegnir garantì ch'ils interess da las scolas autas pitschnas vegnian resguardads adequatamain e che l'autonomia da las instituziuns responsablas vegnia mantegnida.

Da vischnancas e da regiuns
Parpan: Cun renviaments per la procedura da permissiun concernent il dretg da protecziun cunter la canera ha la regenza approvà il plan da zonas parzial 1:1'000 Obertor da la vischnanca da Parpan. Quest plan era vegnì relaschà ils 15 da matg 2007 en vista a la construcziun d'ina bar.
Igis: Il plan d'areal e da quartier Blütenweg, concludì da la vischnanca dad Igis ils 15 da november 2007, vegn approvà.

Projects da vias
La regenza ha approvà totalmain 2'345'000 francs per construir e per sanar ils suandants trajects da vias:
- via naziunala A13: lavurs d'impressari, Rechen Cozz (rempars da lavinas)
- divers objects: furniziun d'implants per il provediment d'electricitad senza interrupziun e d'implants da battarias

Gremi: regenza
Funtauna: rg chanzlia chantunala dal Grischun
Neuer Artikel