Cuntegn da la pagina

La regenza propona da sa participar al concordat davart las mesiras cunter la violenza a chaschun d'occurrenzas da sport

  • Erste Mitteilung
  • Neuen Beitrag einfügen
Il chantun Grischun duai sa participar al concordat davart las mesiras cunter la violenza a chaschun d'occurrenzas da sport. Quai propona la regenza grischuna al cussegl grond. Il parlament vegn a tractar la participaziun en la sessiun d'avust 2008.
Per dar a las autoritads ils instruments necessaris per agir cunter la violenza a chaschun d'occurrenzas da sport avevan las chombras federalas deliberà il mars 2006 ina revisiun parziala da la lescha federala davart mesiras per mantegnair la segirezza interna, e quai cunzunt en vista al campiunadi europeic da ballape 2008 ed al campiunadi mundial da hockey sin glatsch 2009. Per cumbatter la violenza a chaschun d'occurrenzas da sport èn vegnidas determinadas sco mesiras preventivas la registraziun da hooligans, ch'èn daventads violents, en in sistem d'infurmaziun naziunal, la restricziun da bandunar il pajais, ils areals scumandads, l'obligaziun da sa preschentar u la fermanza da polizia.
La durada da questas mesiras è limitada fin la fin da l'onn 2009. La confederaziun lavura vi d'ina midada da la constituziun, tras la quala ella duai survegnir la cumpetenza legislativa en quest sectur. Ils chantuns teman ch'i dettia qua tras ina intervenziun en la suveranitad poliziala chantunala, uschia ch'els èn - empè da quai - s'exprimids per in concordat. Il nov concordat surpiglia las mesiras temporaras e limitadas da la confederaziun e regla las mesiras polizialas preventivas per uschia pudair cumbatter a temp la violenza a chaschun d'occurrenzas da sport. Quai èn ils areals scumandads, l'obligaziun da sa preschentar e la fermanza da polizia. Questas mesiras cunter il hooliganissem n'èn betg mo necessarias per realisar en Svizra il campiunadi europeic da ballape 2008 ed il campiunadi mundial da hockey sin glatsch 2009, mabain er per campiunadis da sport che mobiliseschan in grond public.
Il text dal concordat è vegnì approvà da la conferenza da las directuras e dals directurs chantunals da giustia e polizia (CDCGP) a chaschun da la radunanza d'atun ed è vegnì deliberà per la ratificaziun en ils chantuns. Quest concordat entra en vigur, uschespert che almain dus chantuns èn sa participads ad el, il pli baud dentant il 1. da schaner 2010. Sch'ils parlaments chantunals approveschan a temp il concordat, poi vegnir cuntinuà cun las mesiras suenter ils 31 da december 2009, e quai senza interrupziun e per ina durada illimitada.
Il basegn d'adattar la legislaziun chantunala al concordat è pitschen. La lescha da polizia dal chantun Grischun cuntegna gia disposiziuns davart la spedida, davart il tegnair davent e davart la fermanza da polizia. Sco instanza cumpetenta per ordinar questas mesiras è vegnì designà il cumandant da la polizia chantunala.

Persuna che dat infurmaziuns:
cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01

Gremi: regenza
Funtauna: rg chanzlia chantunala dal Grischun
Neuer Artikel