La regenza ha approvà las prescripziuns da chatscha 2008. Quellas prevesan pitschnas adattaziuns tar la chatscha sin tschiervs, sin chavriels e sin chamutschs. Qua tras duai la chatscha reglar ils buns effectivs da selvaschina en il Grischun e trair a niz quels en moda persistenta. Ils temps da la chatscha auta 2009 èn medemamain vegnids fixads.

Dapi onns vegnan ils tschiervs registrads sistematicamain en il chantun Grischun durant la primavaira. Quest onn èn vegnids dumbrads 11'554 tschiervs, tants sco anc mai dapi l'onn 1987. L'effectiv da primavaira vegn stimà a var 14'000 animals. Il plan da prelevaziun è vegnì adattà en cumparegliaziun cun l'onn precedent e prevesa da sajettar 4'450 tschiervs. Mo sche quest plan vegn realisà en moda consequenta, po l'effectiv da tschiervs vegnir stabilisà. Per quest intent dastgass ina regulaziun fina en furma da la chatscha speziala daventar necessaria en differentas regiuns la fin da l'atun.

Er l'effectiv da chavriels è s'augmentà considerablamain ils onns passads. La chatscha sin chavriels vegn perquai puspè extendida a 21 dis, quai vul dir sin l'entira chatscha auta. Durant envierns cun blera naiv respectivamain durant envierns fraids datti cunzunt tar ils ansiels-chavriel in dumber surproporziunal da selvaschina disgraziada. Quai mussa ch'ina chatscha insuffizienta sin ansiels-chavriel chaschuna dapli murias durant l'enviern. Perquai duai vegnir prendida en mira ina chatscha consequenta sin ansiels-chavriel durant la chatscha speziala la fin da l'atun.

L'ultim atun e l'enviern passà è sa derasada la tschorvadad da chamutschs fin al Calanda. Ultra da las regiuns ch'eran pertutgadas fin ussa vegnan perquai introducidas da nov restricziuns tar la chatscha sin chamutschs er en il territori dal Calanda. En il territori da la Surselva fin al Calanda vegn la chatscha sin chamutschs feminins scursanida per trais dis. En il territori dal Grischun central, da Schons, d'Avras, da la Bregaglia e da l'Engiadin'ota vala questa restricziun er per animals masculins.

Ensemen cun las prescripziuns da chatscha 2008 ha la regenza er gia fixà en moda lianta ils temps da la chatscha auta 2009. Quella ha lieu dal 1. fin e cun ils 13 da settember 2009 sco er dals 21 fin e cun ils 28 da settember 2009.

Persuna che dat infurmaziuns:
dr. Georg Brosi, schef da l'uffizi da chatscha e pestga dal Grischun,
tel. 081 257 38 91

Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun