Navigation

Inhaltsbereich

  • Erste Mitteilung
  • Neuen Beitrag einfügen
Il nov access senza obstachels a l'edifizi dal cussegl grond a Cuira è vegnì terminà per il cumenzament da la sessiun d'avust. Umans cun e senza impediments prendan ussa la medema via. L'edifizi dal parlament ha in access degn e represchentativ. Per tut las visitadras e per tut ils visitaders vegni ad esser pussaivel d'entrar en l'edifizi dal cussegl grond senza obstachels e senza stuair s'exponer.

En il rom dal concept chantunal "Construir senza obstachels" è er l'access da l'edifizi dal cussegl grond vegnì adattà a las prescripziuns ed a las pretensiuns correspundentas. La realisaziun da quest project n'è betg stada facila, cunquai che l'edifizi dal cussegl grond è in stabiliment istoric d'impurtanza publica e sa chatta en in lieu fitg exponì. Per ademplir las pretensiuns e per chattar ina soluziun ha l'uffizi da construcziun auta organisà ina concurrenza tranter architectas ed architects grischuns.

L'access na dueva betg mo esser liber d'obstachels, mabain er avair in effect represchentativ ed in'auta qualitad architectonica. D'unir tut quests criteris en in project è reussì il meglier a l'architect Valerio Olgiati, uschia che ses project è vegnì realisà. Cun mo trais elements - ina rampa, ina schiba purtanta ed in tetg che cuvra tut quai - vegn creada ina sculptura architectonica che ademplescha las pretensiuns funcziunalas, urbanisticas e concepziunalas. Il project surpiglia il caracter arcaic da l'arsenal da Johannes Ludwig da l'onn 1863 e preschenta - cun sias furmas cleras e radicalas - ina generusadad che correspunda a la chasa.

La furma modesta ed il material simpel ch'èn vegnids tschernids per l'access laschan dentant emblidar la cumplexitad da l'ovra ch'è stada ina gronda sfida per l'inschigner e per l'impressari. Il tetg precumprimì tanscha lunsch or e paisa 90 tonnas. El n'è betg fixà vi da l'edifizi existent ed è postà, en moda decentrala, sin ina schiba. Questa schiba porta la paisa, ma surpiglia er la stabilisaziun da las influenzas orizontalas, sco il vent e terratrembels. Las mancanzas dal tuttafatg esteticas ch'èn anc avant maun vegnan previsiblamain eliminadas suenter la sessiun d'avust.

Per l'ovra da construcziun vegni fatg quint cun custs da 670'000 francs. Ella n'è dentant betg mo ina construcziun funcziunala, mabain marchescha l'entrada da l'edifizi il pli public e forsa il pli impurtant dal chantun ed ha pia er ina funcziun represchentativa.

Infurmaziuns:
Markus Dünner, architect chantunal, uffizi da construcziun auta, tel. 081 257 36 31

Gremi: uffizi da construcziun auta
Funtauna: rg uffizi da construcziun auta
Neuer Artikel