Mesemna, ils 23 da settember 2009, visita la regenza da l'Appenzell dadens il Grischun. Ella vegn manada dal president da la regenza e schef dal departament d'educaziun Carlo Schmid-Sutter. Accumpagnà vegn el dal vicepresident e schef dal departament d'economia publica Daniel Fässler, da Werner Ebneter, schef dal departament da sanadad e fatgs socials, da Lorenz Koller, schef dal departament d'agricultura e selvicultura, da Stefan Sutter, schef dal departament da construcziun e protecziun da l'ambient, da Melchior Looser, schef dal departament da giustia, polizia e militar sco er dal chancelier chantunal Markus Dörig. La regenza grischuna - manada dal president da la regenza Hansjörg Trachsel - vegn ad esser preschenta cumplettamain.
Suenter il bainvegni dals giasts en la chasa grischa a Cuira èn previs in viadi a Flem, ed - en cas da bell'aura - ina spassegiada a Conn sin la plattafurma panoramica sur la chavorgia dal Rain. Il suentermezdi vegn visitada la resgia gronda a Domat. La visita serva en emprima lingia a la tgira da las relaziuns amicablas ed al barat d'experientschas sin ils champs da la cultura, da l'economia e da la politica.

Gremi: chanzlia chantunala dal Grischun
Funtauna: rg chanzlia chantunala dal Grischun