Navigation

Inhaltsbereich

  • Erste Mitteilung
  • Neuen Beitrag einfügen

Per motivs actuals ha la cumissiun per giustia e segirezza sa laschà orientar da la cussegliera guvernativa Barbara Janom Steiner sco er da represchentantas e da represchentants da l'administraziun davart il stadi da las lavurs en connex cun la realisaziun da la refurma da la giustia en ils circuls. Quai a chaschun da sia sesida che ha gì lieu dacurt. Il detretschament da las incumbensas giudizialas era vegnì acceptà cleramain da las votantas e dals votants grischuns ils 17 da matg 2009 cun passa 61% da las vuschs.
La cumissiun ha prendì enconuschientscha dal fatg che la refurma da la giustia – ch'è vegnida acceptada dal pievel – ha per consequenza che las presidentas cirquitalas ed ils presidents cirquitals, che vegnan elegids il zercladur 2010, entran en uffizi il 1. d'avust 2010 e pon exequir lur funcziuns giudizialas mo gist durant 5 mais. Empè da prevair ina revisiun chara e sproporziunada da la constituziun per ina perioda d'uffizi da mo 5 mais (da l'avust fin la fin da december 2010), sco quai ch'ina part da las presidentas cirquitalas e dals presidents cirquitals pretenda, ha la regenza examinà differentas propostas da soluziun per garantir che la giustia funcziunia, ed ha sviluppà quatter scenaris en chaussa:

  • Scenari 1: elecziun da la persuna d'uffizi da fin ussa. Quest scenari correspunda ad ina prolungaziun da la perioda d'uffizi e na basegna naginas mesiras accumpagnantas.
  • Scenari 2: elecziun d'ina nova persuna che vegn sustegnida d'ina persuna spezialisada u da la persuna ch'è stada en uffizi fin ussa. Dumandadas èn qua cunzunt las persunas ch'èn stadas en uffizi fin ussa. Ellas dessan vinavant lur enconuschientschas e lur savida a las novas persunas d'uffizi. Cas cuntrari pudessan vegnir consultadas persunas spezialisadas d'ordaifer (p.ex. advocatas ed advocats).
  • Scenari 3: elecziun d'ina nova persuna senza il sustegn d'ina persuna spezialisada. Ubain che la persuna dispona da las enconuschientschas e da la savida ch'i dovra per ademplir las incumbensas giudizialas, ubain che la dretgira chantunala prenda las mesiras necessarias sco autoritad da surveglianza (attribuziun ad in auter presidi cirquital u substituziun extraordinaria per ils 5 mais).
  • Scenari 4: nagina elecziun dal presidi cirquital e/u da la substituziun. En cas ch'ina elecziun na reussiss betg, vegnissi en emprima lingia en dumonda per la regenza da nominar ina cumissaria u in cumissari da la regenza.

Suenter avair discutà ed examinà detagliadamain ils scenaris, è la cumissiun arrivada a l'opiniun unanima ch'i po e ch'i duai vegnir desistì da reveder la constituziun, cunquai che la revisiun fiss en vigur mo durant 5 mais. La lavur na stess en nagina relaziun cun il niz. La cumissiun è plinavant da l'avis che las propostas da soluziun da la regenza sajan adattadas e raschunaivlas. Perquai sustegna ella ils sforzs da la regenza da reglar la curta fasa transitorica da 5 mais.

Infurmaziuns:
Rudolf Kunz, president da la cumissiun per giustia e segirezza, tel. 079 754 22 18

Gremi: cumissiun per giustia e segirezza
Funtauna: rg cumissiun per giustia e segirezza

Neuer Artikel