La regenza grischuna ha approvà la cunvegna da las vischnancas da Cazas, da Purtagn, da Preaz, da Sarn e da Tartar da fusiunar a la vischnanca da Cazas. Ella ha deliberà la missiva correspundenta e propona al cussegl grond da metter en vigur la fusiun per il 1. da schaner 2010. Il cussegl grond vegn a tractar la fatschenta en la sessiun da december 2009.
Tenor l'artitgel 64 da la constituziun chantunala promova il chantun la fusiun da vischnancas per garantir che lur incumbensas vegnian ademplidas en moda cunvegnenta ed economica. Per quest intent po il chantun pajar contribuziuns. La nova vischnanca da Cazas survegn dal chantun ina contribuziun da promoziun en l'autezza da totalmain 3'800'000 francs.
Sch'il cussegl grond accepta questa fatschenta ed er la fusiun a la vischnanca da Churwalden che sto anc vegnir approvada, vegn il dumber da vischnancas dal Grischun a sa reducir per il cumenzament da l'onn 2010 da 190 a 180. Gia concludida è vegnida la fusiun a la nova vischnanca da Bregaglia.


Gremi: regenza
Funtauna: rg chanzlia chantunala dal Grischun