En il Grischun han terminà dacurt 13 bibliotecaras lur furmaziun
supplementara ed han survegnì il certificat da la cuminanza da lavur da
las bibliotecas svizras da lectura publica (CLP).
La biblioteca chantunala dal Grischun porscha regularmain ina
furmaziun supplementara per persunas creschidas, per ch'i possia vegnir
prestada ina lavur da bibliotecara cumpetenta en las passa 50
bibliotecas da scola e communalas dal chantun. Questa furmaziun
supplementara ademplescha las prescripziuns da qualitad da las
directivas vertentas da la cuminanza da lavur da las bibliotecas svizras
da lectura publica (CLP). Ils curs vegnan organisads - en num da la
cumissiun da bibliotecas dal chantun Grischun - tras l'incumbensada
chantunala da las bibliotecas Nelly Däscher. Il curs fundamental da la
CLP terminescha suenter 27 dis d'instrucziun cun in examen.
Dacurt han 13 absolventas survegnì il certificat da la CLP a
chaschun d'ina festa da finiziun. En ses pled ha la manadra dal post da
stab per l'egualitad da las schanzas, Silvia Hofmann, ludà las
bibliotecaras da la CLP per lur engaschament. La lavur da biblioteca,
cunzunt la promoziun da la lectura, saja ina lavur impurtanta e
pretensiusa per la societad, ina lavur cun in effect persistent per la
populaziun, perquai che la lectura saja ina da las abilitads las pli
impurtantas ch'ins stoppia posseder, per avair success en la vita. Ina
biblioteca saja oz il center d'infurmaziun d'ina vischnanca, in lieu da
scuntrada culturala per tut las abitantas e per tut ils abitants, in
lieu, nua ch'ins po star e chattar contacts socials. Uschia saja la
biblioteca da princip il lieu il pli impurtant d'ina vischnanca.
In certificat han survegnì:
Flavia Arpagaus, Cuira; Petronella Cavegn, Vella; Katrin Germann,
Ftan; Brigitte Hartwig, Bever; Luzia Kohler, Ragaz Bogn; Monica
Lütscher, Domat; Manuela Mullis, Ragaz Bogn; Gabriela Nigg, Küblis;
Regula Röthlisberger, Vaz sut; Doris Schmid, Filisur; Ruth
Schreiber-Roduner, Domat; Marisa Strub-Lazzarini, Oberrieden; Gertrud
Wieser, Zuoz.
Infurmaziun per las medias:
Ina fotografia da las absolventas po vegnir retratga tar la
biblioteca chantunala, Nelly Däscher: tel. 081 257 28 37, e-mail:
Nelly.Daescher@kbg.gr.ch
Gremi: biblioteca chantunala dal Grischun
Funtauna: rg biblioteca chantunala dal Grischun