Per preparar la sessiun da zercladur 2009 a Puschlav ha la cumissiun per politica da stadi e strategia (CPSS) predeliberà differentas fatschentas. Quai ha ella fatg en dus sesidas sut il presidi da Jon Domenic Parolini ed en preschientscha da cusseglier guvernativ Martin Schmid e dal president da la regenza Hansjörg Trachsel.
En la sessiun da zercladur vegnan tranter auter cuntinuadas las tractativas parlamentaras concernent il project per la NGF grischuna. Quai ha dà l'occasiun a la cumissiun per politica da stadi e strategia da sa fatschentar anc ina giada intensivamain cun tscherts secturs tematics da quest project. En quest connex ston vegnir menziunads en spezial e pricipalmain ils secturs da la scola e da la tgira d'uffants cumplementara a la famiglia. In giavisch impurtant per la cumissiun è en spezial che la scolina e che la scola populara sco er ch'ils secturs da la sanadad e dals fatgs socials restian vinavant incumbensas communablas dal chantun e da las vischnancas. Quest intent duai vegnir punctuà explicitamain en ina disposiziun legala da la lescha generala. La menziun da quest intent en la lescha generala na chaschuna dentant nagin spustament ni da las cumpetenzas ni da la repartiziun finanziala tranter il chantun e las vischnancas per ils secturs correspundents.
Observond in'expertisa giuridica ch'è vegnida fatga per incumbensa da la cumissiun fan la cumissiun e la regenza la proposta al cussegl grond d'adattar la lescha davart las scolas medias, uschia che las vischnancas ston pajar ils emprims dus onns dal gimnasi inferiur per ils giuvenis che vivan en questas vischnancas, entant ch'ils geniturs vegnan a medem temp deliberads da pajar las taxas da scola.
En cas da la tgira d'uffants cumplementara a la famiglia propona la cumissiun – observond las propostas da las commembras e dals commembers dal parlament, las qualas ella surpiglia senza resalvas – ch'il chantun duai esser l'instanza che cusseglia e che sustegna las vischnancas e las purschidras ed ils purschiders. Il chantun duai er esser responsabel per determinar la moda da calcular dals custs normads. Tenor l'opiniun da la cumissiun duai la participaziun da la vischnanca da domicil da l'uffant tgirà plinavant importar almain 50 pertschient ils emprims trais onns da gestiun da las purschidras u dals purschiders e pli tard alura almain 40 pertschient. La dumonda dal plenum dal parlament, tenor la quala la procentuala pli auta per ils custs normads duai er valair per la vischnanca da domicil, sche la vischnanca, nua che l'instituziun respectiva da tgira sa chatta, sa participescha cun ina tala als custs normads è vegnida acceptada unanimamain da la cumissiun.
Sa referind a la lescha davart l'agid social public ed a la lescha davart il sustegn da persunas basegnusas ch'èn gia vegnidas concludidas dal cussegl grond en ina emprima lectura la sessiun d'avrigl ha ina minoritad da la cumissiun fatg la proposta da revegnir a questas leschas e cumbinà ella cun la proposta da laschar tar il chantun l'organisaziun dals servetschs socials e l'adempliment da lur incumbensas e da surdar a las vischnancas la finanziaziun da las prestaziuns ch'ellas han furnì. In puntg da discussiun final è alura stada la dumonda dal referendum. Ina minoritad da la cumissiun beneventa ch'il project da la NGF vegnia suttamess facultativamain ad in referendum. Ensemen cun la regenza vul la maioritad da la cumissiun suttametter la lescha generala davart la NGF grischuna al referendum facultativ.
Ultra da quai è la cumissiun sa fatschentada cun la terza ed ultima etappa da GRiforma. Ella propona unanimamain al cussegl grond d'entrar en quest project. Cun excepziun d'in pèr paucas midadas pitschnas suonda la cumissiun – er en quai che reguarda il cuntegn – las propostas da la regenza tenor missiva.
In ulteriur tema è stada la controlla dal success dal program da l'onn 2008 da la regenza. Suenter che tut las dumondas han pudì vegnir respundidas cuntentaivlamain da la regenza en moda directa u per correspundenza, propona la cumissiun al cussegl grond d'entrar en il program da l'onn 2008 e da prender enconuschientscha da quel.

Infurmaziuns:
Jon Domenic Parolini, president da la cumissiun per politica da stadi e strategia,tel. 081 860 03 05 u 079 280 72 92

Gremi: cumissiun per politica da stadi e strategia
Funtauna: rg cumissiun per politica da stadi e strategia