Il departament d'economia publica e fatgs socials ha elavurà in sboz per ina lescha sco er in rapport explicativ davart la taxa turistica chantunala (TTC). Quel cuntegna er variantas tar la TTC. La regenza è vegnida orientada davart il stadi dal project. Il departament ha ussa incumbensà l'uffizi per economia e turissem d'elavurar in sboz d'ina lescha detaglià per ina varianta. La consultaziun vegn lantschada la fin da l'onn 2009.

Il departament d'economia publica e fatgs socials ha elavurà in sboz per ina lescha davart la finanziaziun da las organisaziuns turisticas - la basa per la TTC - sco er redigì in rapport explicativ en chaussa. Ultra da quai èn vegnidas examinadas variantas tar la TTC. Suenter che la regenza è vegnida orientada, pon ussa vegnir fatgas las ultimas lavurs da detagl e la consultaziun po vegnir lantschada per la fin da l'onn 2009.
Ina da las alternativas ch'èn vegnidas preschentadas en il rapport explicativ sco variantas tar la TTC duai ussa vegnir elavurada pli precis. En spezial vegn l'uffizi per economia e turissem incumbensà d'elavurar tar quest concept alternativ da nov in sboz detaglià per ina lescha respectiva. Fin ussa è questa varianta mo vegnida preschentada en ina lescha generala da princip. Per la consultaziun vegn uschia a star a disposiziun ina meglra basa da decisiun tant per la varianta sco er per la TTC.
L'intent da la TTC è quel da stgaffir las cundiziuns generalas per il turissem per che quel possia agir - suenter las adattaziuns da las structuras e suenter las fusiuns a las organisaziuns turisticas actualas - en moda d'in interprendider e confurm al martgà. En quest connex duain las passa 100 taxas communalas da cura e las taxas communalas per promover il turissem vegnir remplazzadas tras in sistem che vala en l'entir Grischun e che pussibilitescha d'impunder ils meds finanzials en moda pli flexibla per incumbensas da marketing e d'infrastructura. Ultra da quai duain ils meds finanzials vegnir augmentads per render enconuschent la purschida turistica dal Grischun a novs giasts.

Infurmaziuns:
president da la regenza Hansjörg Trachsel, schef dal departament d'economia publica e fatgs socials, tel. 081 257 23 01

Gremi: departament d'economia publica e fatgs socials
Funtauna: rg departament d'economia publica e fatgs socials