Il chantun Grischun duai cumprar l'edifizi dal cussegl grond a Cuira. Quai propona la regenza en sia missiva correspundenta al cussegl grond e dumonda da conceder in credit dad 8,3 milliuns francs per la cumpra. Il parlament vegn a tractar questa fatschenta en la sessiun d'avust.

Dapi 50 onns prenda il chantun en locaziun l'edifizi dal cussegl grond a la Masanserstrasse. L'edifizi appartegna a la cassa da pensiun chantunala. Mintga onn paja il chantun in tschains da locaziun da var 550'000 francs. Sin basa dal contract da locaziun existent sto il chantun surpigliar gia oz obligaziuns da proprietari ed è per exempel responsabel per il manaschi da tut las installaziuns da la chasa. En il passà ha il chantun endrizzà differentas installaziuns, sco indrizs da projecziun, ch'èn stadas cumbinadas cun custs considerabels.
Ord vista istorica e cunzunt ord vista statalpolitica è l'edifizi dal parlament ina da las immobiglias las pli impurtantas che vegn utilisada dal chantun Grischun. Dentant betg mo ord vista istorica e statalpolitica, mabain er per motivs organisatorics ed economics è l'acquist da l'edifizi ina soluziun cunvegnenta tenor il giudicament da la regenza. Tras la cumpra da l'edifizi pon numnadamain vegnir cuntanschidas relaziuns da proprietad unitaras e cleras. Implicaziuns nunnecessarias e disturbantas en connex cun la gestiun da l'immobiglia pon vegnir eliminadas e mesiras architectonicas necessarias pon vegnir realisadas pli svelt ed en moda pli facila. Per ina gestiun effizienta ed adequata èsi - ord vista dal manaschi - d'avantatg d'avair ina soluziun pragmatica e simpla cun uschè paucas instituziuns participadas sco pussaivel. Il pretsch da cumpra, ch'è vegnì fixà ad 8,3 milliuns francs, è adequat tenor l'avis da la regenza, ed el è acceptabel per tuttas duas partidas. Sch'ins cumpareglia l'opziun da cuntinuar cun il contract da locaziun cun la pussaivladad d'acquistar l'edifizi, predomineschan - ord vista da la regenza - ils avantatgs d'ina cumpra.
L'edifizi vegn duvrà dapi l'onn 1959 sco lieu per las sessiuns dal cussegl grond. El è vegnì suttamess l'ultima giada ils onns 1992/1993 ad ina sanaziun cumpletta. Fin ils onns 1950 vegniva l'edifizi duvrà sco arsenal.

Infurmaziuns:
- cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01
- Markus Dünner, architect chantunal, uffizi da construcziun auta, tel. 081 257 36 31

Gremi: regenza
Funtauna: rg chanzlia chantunala dal Grischun