Per sviluppar projects e per promover scenaris da films documentars e da films
dramatics rumantschs lantschan l'uffizi federal da cultura (UFC), secziun "film", ed il
chantun Grischun, partiziun "promoziun da la cultura", a partir da l'onn 2009 ina
concurrenza da pilot da dus onns.
Pervia da la situaziun difficila, en la quala sa chatta la cinematografia rumantscha
independenta, sa participeschan l'uffizi federal da cultura ed il chantun Grischun a
quest project da pilot ch'è limità per entant a dus onns. La finamira è quella da
meglierar las cundiziuns generalas. Il medem mument è questa concurrenza da film ina
contribuziun a la diversitad linguistica. Talas pussaivladads da promover il film existan
gia en la Svizra franzosa e taliana. Las petentas ed ils petents ston esser producentas
e producents independents da films e ston ademplir las premissas generalas da la
lescha federala davart ils films.
Il UFC e l'uffizi da cultura, partiziun "promoziun da la cultura", garanteschan in import
maximal da mintgamai maximalmain 50'000 francs per onn per questa promoziun per
ils onns 2009 e 2010. I vegnan pajads maximalmain 15'000 francs per project e
maximalmain 50 pertschient dals custs imputabels d'in project. Il UFC, secziun "film",
sustegna ils projects cun la medema summa sco il chantun Grischun.
Per l'uffizi federal da cultura, secziun "film", è la basa per giuditgar las dumondas la
decisiun da promoziun da l'uffizi da cultura, partiziun "promoziun da la cultura" che la
nova cumissiun da concurrenza per sviluppar ovras audio-visualas rumantschas ha
prendì. La cumissiun da concurrenza consista ils onns 2009 e 2010 dad Armon
Fontana, uffizi da cultura, partiziun "promoziun da la cultura", dad Esther Krättli Jenny,
presidenta da la concurrenza per promover la lavur culturala professiunala, e da Peter
Egloff, publicist ed anteriur manader da program da la televisiun rumantscha.
Dumondas ston vegnir inoltradas tar l'uffizi da cultura dal Grischun, partiziun
"promoziun da la cultura". Producentas e producents da film interessads pon s'infurmar
e retrair il formular d'annunzia tar il post per la promoziun da la cultura dal Grischun,
signur Armon Fontana, Loëstrasse 26, 7001 Cuira, tel.: 081 254 16 02, fax: 081 254 16
84, e-mail:
armon.fontana@afk.gr.ch ,
pagina d'internet:
www.kulturfoerderung.gr.ch.
Il termin final per l'inoltraziun
è ils 13 da mars 2009 (data dal bul postal).
Infurmaziuns:
Armon Fontana, promoziun da la cultura dal Grischun, Loëstrasse 26, 7001 Cuira, tel.
081 254 16 02, e-mail:
armon.fontana@afk.gr.ch.
Gremi: uffizi da cultura
Funtauna: rg uffizi da cultura