En il chantun Grischun duai l'execuziun giudiziala vegnir reglada da
nov sin il stgalim d'ina lescha e vegnir adattada a las novas
disposiziuns federalas. La regenza grischuna ha deliberà la missiva tar
la nova lescha davart l'execuziun giudiziala en il chantun Grischun per
mauns dal cussegl grond. Il parlament vegn a tractar questa fatschenta
en la sessiun d'avust.
Sin plaun federal entran en vigur l'onn 2011 la nova procedura
penala svizra e la procedura penala svizra per giuvenils. Fin alura ston
ils chantuns far las adattaziuns necessarias en lur dretg chantunal. Per
il sectur da l'execuziun da chastis e da mesiras dovri perquai in agen
relasch sin il stgalim d'ina lescha.
Puncts centrals da la nova lescha davart l'execuziun giudiziala èn
las regulaziuns davart la segirezza e davart l'urden, davart il sforz
direct e davart ils fatgs disciplinars en las instituziuns d'execuziun.
Medemamain vegnan adattadas las regulaziuns davart l'execuziun da
sancziuns dal dretg penal per giuvenils. Qua è previsa ina stretga
collavuraziun tranter la procura per giuvenils e l'uffizi per
l'execuziun giudiziala. Plinavant fixescha il dretg nov las premissas
per dastgar communitgar datas da persunas che sa refereschan a
l'execuziun giudiziala. Da nov pon las autoritads infurmar - sin dumonda
- las victimas da delicts grevs davart il cumenzament dal chasti u da la
mesira d'ina persuna sentenziada, davart ses congedi, davart ses
transferiment e davart sia relaschada. Actualmain na datti betg ina basa
legala chantunala che tegness quint dals dretgs giustifitgads da las
victimas da vegnir infurmadas durant la fasa da l'execuziun.
Ultra da quai vegn la basa legala dal post da cussegliaziun per
persunas violentas, che figurava fin ussa sin il stgalim d'ina
ordinaziun, auzada sin il stgalim d'ina lescha. La finamira dal post da
cussegliaziun che ha cumenzà cun sia lavur il settember 2007 è quella da
mussar vias or da la spirala da violenza, e quai tras cussegliaziuns
voluntaras. Plinavant vul il chantun francar da nov en la lescha che la
polizia stoppia - cunzunt en cas d'intervenziuns en il sectur da la
violenza a chasa - annunziar al post da cussegliaziun per persunas
violentas, sch'ina persuna è vegnida spedida or da l'abitaziun.
In'ulteriura novaziun essenziala è previsa en connex cun la
finanziaziun dals custs per l'execuziun da mesiras. Da nov desista il
chantun da metter a quint a las vischnancas ils custs per l'execuziun da
mesiras penalas staziunaras en ils stabiliments d'execuziun. Il fatg
ch'il chantun surpiglia quests custs correspunda a la nova concepziun da
la gulivaziun da finanzas e da la repartiziun da las incumbensas tranter
il chantun e las vischnancas (NGF grischuna).
Infurmaziuns:
cussegliera guvernativa Barbara Janom Steiner, scheffa dal
departament da giustia, segirezza e sanadad, tel. 081 257 25 01
Gremi: regenza
Funtauna: rg chanzlia chantunala dal Grischun