Las elecziuns da la regenza e las elecziuns cirquitalas per la proxima perioda d'uffizi han lieu dumengia, ils 13 da zercladur 2010. In eventual segund scrutini è previs per dumengia, ils 4 da fanadur 2010. Quai ha concludì la regenza grischuna. Las elecziuns da renovaziun da la regenza valan per la perioda d'uffizi dal 1. da schaner 2011 fin ils 31 da december 2014.
Las elecziuns cirquitalas (elecziuns da las commembras e dals commembers dal cussegl grond ed elecziun da la presidenta u dal president cirquital sco er da la vicepresidenta u dal vicepresident cirquital) valan per la perioda d'uffizi dal 1. d'avust 2010 fin ils 31 da fanadur 2014. La preparaziun e la realisaziun da las elecziuns da renovaziun da la regenza è chaussa da la chanzlia chantunala, l'organisaziun da las elecziuns cirquitalas è chaussa dals circuls. Ils termins d'elecziun èn reglads tras la lescha. Tenor la lescha davart ils dretgs politics en il chantun Grischun han lieu las elecziuns da la regenza e las elecziuns cirquitalas a medem temp, per regla il matg u il zercladur.
En connex cun l'iniziativa dal pievel ch'è vegnida lantschada ultimamain "Per elecziuns pli gistas en il cussegl grond" (iniziativa da proporz) manifesteschan las iniziantas ed ils iniziants l'aspectativa che las proximas elecziuns dal cussegl grond, l'onn 2010, pudessan gia vegnir realisadas tenor la nova procedura, sch'il pievel sa decidess a favur da l'iniziativa. En vista a la procedura normada ch'ina iniziativa sto percurrer n'è questa aspectativa dentant betg giustifitgada. En la pratica dals ultims onns è la durada media d'ina procedura d'iniziativa stada circa 18 mais. Quest temp s'extenda da l'inoltraziun fin la votaziun dal pievel. Schebain ch'i reussiss en quest cas da scursanir considerablamain la durada da la procedura, ston vegnir agiuntads auters fatgs che na permettan betg d'applitgar la nova procedura d'elecziun gia per las proximas elecziuns dal cussegl grond. Quests fatgs èn tranter auter la legislaziun executiva necessaria e la realisaziun pratica dal nov sistem electoral.

Il Grischun sa participescha al concordat davart las mesiras cunter la violenza a chaschun d'occurrenzas da sport
La regenza grischuna ha declerà la participaziun al concordat davart las mesiras cunter la violenza a chaschun d'occurrenzas da sport. Il cussegl grond aveva approvà la participaziun ils 29 d'avust 2008. Il termin da referendum è scadì ils 3 da december 2008. Entaifer quest termin n'èn vegnids inoltrads nagins referendums. Quest concordat entra en vigur, uschespert che almain dus chantuns èn sa participads ad el, il pli baud dentant il 1. da schaner 2010. Il nov concordat regla las mesiras polizialas preventivas per uschia pudair cumbatter a temp la violenza a chaschun d'occurrenzas da sport. Quai èn tranter auter ils areals scumandads, l'obligaziun da sa preschentar e la fermanza da polizia.

Da vischnancas e da regiuns - Sevgein: En il vitg da Sevgein vegn fixada la sveltezza maximala a 30 km/h ed introducida ina "zona da tempo 30", e quai integrond la via chantunala. Il medem mument vegn spustada la signalisaziun dal cumenzament dal vitg (50 "limita generala") tar l'entrada dal vitg al nordvest per ca. 70 m en direcziun da Glion.

Contribuziuns chantunalas a differentas instituziuns
- Club da lutga da la Mantogna: Per construir da nov il tschaler da lutga a Cazas survegn il club da lutga da la Mantogna ina contribuziun da maximalmain 100'000 francs or dal fond da sport.
- Project "musica per tuts": Las occurrenzas en il rom dal project "musica per tuts" dals 30 d'avust fin ils 13 da settember 2009 si Brambrüesch ed a Cuira vegnan sustegnidas cun ina garanzia da deficit da maximalmain 25'000 francs.
- Fundaziun "furmaziun e svilup": A la fundaziun "furmaziun e svilup", Berna, post spezialisà per la furmaziun en ina perspectiva globala vegn concedida – per la premiaziun da medias didacticas – ina contribuziun unica da 20'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun